ހުރިހާ ގޭބީސީ އަކަށް ލިބެންދެން މަސްދަޅު ބަހާނެ- ވަޒީރު އާދަމް ޝަރީފް

ހުރިހާ ގޭބީސީ އަކަށް ލިބެންދެން ރޯދަ ހަދިޔާގެ ގޮތުގައި ބަހަމުންދާ މަސްދަޅުކޭސް 28 ފެބްރުވަރީގެ ފަހުންވެސް ބަހަމުން ގެންދާނެ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ވަޒީރު ވިދާޅުވީ ދިގު ކިއު އަށް ނޭރިޔަސް ކުރިއަށް އޮތް ދުވަސްތަކުގައި ފަސޭހައިން މަސްދަޅުކޭސް ލިބޭނެ އިންތިޒާމުތައްހަމަޖެއްސުމުގެ މަސައްކަތްތައް ކުރައްވަމުން ގެންދަވާ ކަމަށެވެ. އެގޮތުން މާދަމާރޭ މަސްދަޅުކޭސް ބަހަން ފަށާއިރު އިތުުރު 13 ތަނެއްގައި މަސްދަޅުކޭސް ބެހުމަށް ހަމަޖެހިފައިވާ ކަމަށާއި ކޮންމެ ޑިސްޓްރިބިއުޝަން ސެންޓަރެއްގައި 5 މޭޒު ހުންނާނެ ކަމަށްވެސް ވަޒީރު ވިދާޅުވެފައި ވެއެވެ.

މަސްދަޅު ބެހުމަށް ހަމަޖެހިފައިވާ ތަންތަން:

•  ގަލޮޅު ދަނޑު 4 ފަރާތުގެ ސިޑިބަރި ކައިރި
• ސޯޝަލް ސެންޓަރ
• ހެންވޭރު ދަނޑު
• ފޭސް 1 އަދި 2 ގެ އިތުރު ދެތަން

 ވަޒީރު އިތުރަށް ވިދާޅުވީ ދުވާލު ހޫނު ގަދަ ކަމަށް ފެންނާތީ މަސްދަޅު ބެހުން ކުރިއަށްދާނީ ހަމައެކަނި ރޭގަނޑު ކަމަށެވެ. ސަރުކާރުންދޭ އީދު ހަދިޔާ މާލޭ ސަރަޙައްދުގައި ބަހަން ފަށާފައިވަނީ އިއްޔެގައެވެ. ފުރަތަމަ ދުވަހު މާލެ ސަރަހައްދުގެ 9394 ގޭބީސީއަކަށް މަސްދަޅު ކޭސް ބަހާފައިވާކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރު ވަނީ ވިދާޅުވެފައެވެ. ވަޒީރު ވިދާޅުވީ ކިޔުގައި ގިނަ ވަގުތު އާންމުން ތިބެންޖެހުމުން އެކަމާ ހިތާމަކުރައްވާކަމަށެވެ. އެހެންކަމުން އިންސާނީ ވަސީލަތް އިތުރުކޮށް އިންތިޒާމްތައް ރަނގަޅުކުރުމުގެ މަސައްކަތް ކުރައްވަމުންދާކަމަށެވެ.

ވަޒީރު އާދަމް ޝަރީފް އުމަރު ވިދާޅުވީ، ފުރަތަމަ ދުވަހު މާލެ ސަރަހައްދުގެ 9394 ގޭބީސީއަކަށް މަސްދަޅު ކޭސް ބަހާފައިވާކަމަށެވެ. ވަޒީރު ވަނީ  ފުރަތަމަ ދުވަހު ބެހުނު މަސްދަޅުތަކުގެ ތަފްސީލުތައް ހިއްސާ ކުރައްވާފައެވެ.

ފުރަތަމަ ދުވަހު މަސްދަޅުކޭސް ބެހުނު އަދަދު:
ވިލިމާލެ- 582 ކޭސް
 އެމްޓީސީސީ ޝޯމިލް- 2083  ކޭސް
މިފްކޯ- 3666  ކޭސް
ހިޔާ ފްލެޓް ޓަވަރު 10- 1555 ކޭސް
އުމަރު ޒާހިރު ބިލްޑިންގ- 1508  ކޭސް

ޖުމުލަ- 9394 މަސްދަޅު ކޭސް

މިހާރު ބަހަމުންދާ މަސްދަޅުކޭސް ތަކަކީ ރައީސުލްޖުމްހޫރިއްޔާ ދެއްވާ ރޯދަ ހަދިޔާއެވެ. ރަމަޟާންމަހު ކޮންމެ ގޭބީސީއަކަށް މަސްދަޅު ކޭހެއް ހަދިޔާކުރުމަށް ނިންމަވާފައިވާކަން ރައީސް އިޢުލާންކުރެއްވީ، މިދިޔަ ނޮވެންބަރު މަހު ބޭއްވި ސަރުކާރަށް އެއްއަހަރު ފުރުން ފާހަގަކުރުމުގެ ގޮތުން ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.