ދައުރު ނިމިގެންދާއިރު 500 އިމާމުންނަށް ރާއްޖޭން ބޭރުން ތަމްރީން ދީ، 1000 ޒުވާން ޚަޠީބުން މައިދާނަށް ނެރޭނަން - މިނިސްޓަރ ޝަހީމް

އަމާޒަކީ މި ދައުރުގެ ކޮންމެ އަހަރަކު ރާއްޖޭން ބޭރުން 100 އިމާމުން ތަމްރީން ކުރުންކަމަށާއި ދައުރު ނިމިގެންދާއިރު 500 އިމާމުންނަށް ރާއްޖޭން ބޭރުން ތަމްރީން ދިނުންކަމަށާއި، 1000 ޒުވާން ޚަޠީބުން މި ދައުރުގެ ތެރޭގައި މައިދާނަށް ނެރުން ކަމަށް އިސްލާމީ ކަންތައްތަކާބޭހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

އިމާމުންގެ މަހާސިންތާ ފެށުމުގެ ގޮތުން ބޭއްވި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ، މިއަހަރުގެ މިހާތަނަށް ރާއްޖޭން ބޭރުން 60 އިމާމުންނަށް ތަމްރީން ދީފައިވާއިރު، ޒުވާން ޚަޠީބުން ޕްރޮގުރާމްގެ ދަށުން 300 އަށްވުރެ ގިނަ ޒުވާން ޚަޠީބުން ތަމްރީންކޮށްފައިވެއެވެ.

ވަޒީރު ވިދާޅުވީ މި މަހާސިންތާގައި މަޝްވަރާކުރާ ކަންތައްތައް ތަންފީޒު ކުރައްވާނެކަމަށެވެ. އެގޮތުން އިމާމުންގެ އައު އޮނިގަނޑު އެކުލަވާލާއިރުވެސް މި މަހާސިންތާގައި ނިންމާ މުހިންމު ނިންމުންތައް އައު އޮނިގަނޑުގައި ހިމަނުއްވާނެކަމަށް ވަޒީރު ވިދާޅުވިއެވެ.

އިމާމުންނަށް ޚާއްޞަކޮށްގެން 1 ދުވަހަށް ކުރިއަށްގެންދާ މި މަހާސިންތާގައި 500 އަށްވުރެ ގިނަ އިމާމުން ބައިވެރިވެއެވެ. މީގެ ތެރޭގައި އޮންލައިންކޮށް 300 އިމާމުންނާއި  ޙާޟިރުވެގެން ބައިވެރިވާ 208 އިމާމުން ހިމެނެއެވެ