މަސްދަޅުކޭސް ބަހާ ކޮންމެ މަރުކަޒަކަށް ދޫކުރާ ޓޯކަންގެ އަދަދު އިތުރުކުރަން ނިންމައިފި

ފަސޭހަ ކަމާއެކު އަވަހަށް ޚިދުމަތް ދިނުމަށްޓަކައި މަސްދަޅުކޭސް ބަހާ ކޮންމެ މަރުކަޒަކުން ދޫކުރާ ޓޯކަންގެ އަދަދު އިތުރުކުރުމަށް ނިންމާފައިވާކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ވަޒީރު ވިދާޅުވީ 22 ފެބުރުވަރީ ވީ ހޮނިހިރު ދުވަހުގެ ރޭ، ވަރަށް އޮމާންކޮށް އަދި ވަރަށް ފަސޭހަ އިންތިޒާމުތަކެއްގެ ތެރެއިން ރޯދަ ހަދިޔާ ދޫކުރުން ކުރިޔަށްގެންދެވުނު ކަމަަށެވެ. އެއާއެކު، ރައްޔިތުންނަށް އިތުރަށް ފަސޭހަކޮށްދިނުމުގެ ގޮތުން، މިރޭ 18:00 ގައި ޓޯކަން ދޫކުރުން އަލުން ފަށާއިރު  ކޮންމެ މަރުކަޒަކަށް ދޫކުރާ ޓޯކަންގެ އަދަދު ރެޔަށްވުރެ އިތުރުކުރާނެ ކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ މިރޭ ޓޯކަން ދޫކުރަން ފަށާއިރު، މިހާރު ޓޯކަން ލިބިފައިވާ ފަރާތްތަކަށް ހަމަ އެ ޓޯކަންއަށް މަސްދަޅުކޭސް ލިބޭނެ ކަމަށެވެ. ހަމައެހެންމެ، މިހާރު ޓޯކަން ނަގާފައިވާ ފަރާތްތަކުގެ ތެރެއިން ފަހުގެ ތާރީޚަކަށް ޓޯކަން ލިބިފައިވާ ފަރާތްތައް، ތާރީޚު (އަވަސްކޮށް) ރީޝެޑިއުލްކުރުމުގެ ފުރުސަތު ދިނުމަށްވެސް ނިންމާފައިވާކަމަށް ވަޒީރު ވިދާޅުވިއެވެ. ޓޯކަން ނެގުން ފަދަ ކަމެއްގައި ހައްލުކޮށްލަންޖެހޭ ފަދަ ކަމެއް ކުރިމަތިވާ ފަރާތްތަކަށް އެއް ދިމާލަކުން އެކަމަށް އަޅާލައި، އެކަން ހައްލު ކުރެވޭނެ އިންތިޒާމު ހަމަޖެއްސުމުގެ މަސައްކަތްވެސް ކުރައްވަމުން ގެންދަވާކަން ވަޒީރު ވަނީ ފާހަގަ ކުރައްވާފައެވެ.

ވަޒީރު އިތުރަށް ވިދާޅުވީ ސަރުކާރުގެ އަމާޒަކީ ރޯދަމަހުގެ ކުރިން ހުރިހާ ފަރާތްތަކަށް ރޯދަ ހަދިޔާ ލިބޭނެ އިންތިޒާމު ހަމަޖެއްސުންކަމަށްވުމާއެކު، ހުރިހާ ގޭބިސީއަކަށް ލިބެންދެން ކުރިޔަށްދާނެކަމުގެ ޔަޤީންކަން އަރުވާ ކަމަށެވެ. އެގޮތުން ހުރިހާ ގޭބިސީތަކަށް ރޯދަ ހަދިޔާ ލިބޭނެ ކަމަށްވެސް ވަޒީރުގެ ޕޯސްޓުގައި ވެއެވެ. 

މާލޭ ސަރަޙައްދުގައި މަސްދަޅުކޭސް ބެހުމުގެ ކަންކަން ކުރިއަށްދާނީ ރޭގަނޑު 08:00 އިން 12:00 އަށެވެ. އެގޮތުން 13 ތަނެއްގައިި މަސްދަޅު ބެހުން ކުރިއަށްދާނެއެވެ. މާލެ ސަރަޙައްދުގައި މަސްދަޅުކޭސް ބެހުމުގެ މަސައްކަތް މިފްކޯ ކޮމްޕްލެކްސް (މާފަންނު)، އެމް.ޓީ.ސީ.ސީ ސޯމިލް، ހެންވޭރު ދަނޑު، ގަލޮޅު ދަނޑު، ސޯޝަލް ސެންޓަރު، ވިލިމާލެ – ވެމްކޯ ސައިޓް، ހުޅުމާލެ ފޭސް 1 – އުމަރު ޒާހިރު ބިލްޑިންގ، ހުޅުމާލެ ފޭސް 1– ޕޮލްކޯ ޓަވރ (ސީ ބްލޮކް)، ހުޅުމާލެ ފޭސް 2– ހިޔާ ޓަވަރު 10 އަދި ހުޅުމާލެ ފޭސް 2 – ކާމިލްދީދި ޕްރީސްކޫލް ގައިވެސް މަސްދަޅު ބެހުމުގެ މަސައްކަތްތައް ކުރިއަށް ދެއެވެ.