ވައިގެ މަގުން ޑްރަގު އެތެރެކުރި މީހާގެ ބަންދަށް 15 ދުވަސް

ވައިގެ މަގުން ރާއްޖެއަށް މަސްތުވާތަކެތި އެތެރެކުރި މައްސަލައިގައި ހައްޔަރުކުރި އުމުރުން ދުވަސްވީ މީހާގެ ބަންދަށް 15 ދުވަސް ޖަހައިފި އެވެ.

މީޑިއާއަށް މަޢުލޫމާތު ދެއްވަމުން ފުލުހުން ވިދާޅުވީ  ރާއްޖެއަށް މަސްތުވާތަކެތި އެތެރެކުރި މީހަކު ވެލާނާ އިންޓަނޭޝަނަލް އެއާޕޯޓުން 17 ސެޕްޓެމްބަރ ގައި ހައްޔަރުކޮށްފައިވާކަމަށެވެ. މިކަމާ ގުޅިގެން އަންގާރަ ދުވަހު ހައްޔަރުކޮށްފައިވަނީ ސ.ހިތަދޫ، ވެހެތާނުގެ، ޢަބްދުﷲ ޞާދިގު (65އ) އެވެ. އެތެރެ ކޮށްފައިވާ މަސްތުވާ ތަކެތީގެ ވަގުތީ ބަރުދަނަކީ 349 ގްރާމް ކަމަށްވެސް ފުލުހުން ވިދާޅުވިއެވެ.

މި މައްސަލައާ ގުޅިގެން އޭނާގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް  ހާޒިރުކުރުމުން، ކޯޓުން ވަނީ 15 ދުވަހަށް އޭނާ ބަންދުކުރަން ނިންމައިފަ އެވެ.

ފުލުހުން ދަނީ މި މައްސަލަ އިތުރަށް ތަޙުޤީގު ކުރަމުންނެވެ.