ރައީސްގެ ވަޢުދުފުޅާ އެއްގޮތަށް ތަކަންދުއާއި މާރަންދޫއަށް އާރްޓީއެލްގެ ޚިދުމަތްދޭން ފަށަނީ

ތަކަންދުއާއި މާރަންދޫއަށް އާރުޓީއެލް ފެރީ ދަތުރުތައް ފެށުމަށް ހަމަޖެހިފައިވާކަމަށް ދަތުރުފަތުރާ މަދަނީ އުދުހުންތަކާ ބެހޭ ވުޒާރާއިން ވިދާޅުވެއްޖެއެވެ.

އެ ވުޒާރާއިން އެކްސްގައި ކުރެއްވި ޕޯސްޓުގައި ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހއ. އަތޮޅުގެ ރަށްތަކަށް ކުރެއްވި ދަތުރުފުޅުގައި ވައުދުވެވަޑައިގެންފައިވާގޮތުގެ މަތިން، އާރް.ޓީ.އެލް ފެރީ ދަތުރުތަކުގެ ހއ.އިހަވަންދޫ– ހދ.ކުޅުދުއްފުށި ރޫޓުގައި ހއ.ތަކަންދޫ އަދި ހއ.މާރަންދޫ ހިމަނާފައިވާ ކަމަށެވެ. ހަމައެއާއެކު 2025 ވަނަ އަހަރުގެ ފެބްރުއަރީ 25 ވަނަ ދުވަހުން ފެށިގެން މިދަތުރުތައް ފެށުމުގެ އިންތިޒާމް މިހާރު ހަމަޖެހިފައިވާ ކަމަށްވެސް އެ ޕޯސްޓުގައި ވެއެވެ. 

ރަމަޟާންމަހުގެ ކުރިން އާރުޓީއެލް ފެރީ ތަކަންދުއާއި މާރަންދޫއަށްވެސް ދަތުރުކުރާ ގޮތް ހައްދަވާދެއްވާނެކަމަށް ރައިސުލްޖުމްހޫރިއްޔަ ވިދާޅުވެފައިވަނީ މިދިޔަ މަހު ތިލަދުންމަތީ އުތުރުބުރިއަށް ކުރެއްވި ދަތުރުފުޅުގެތެރެއިން ތަކަންދޫއަށް ވަޑައިގެން ދެއްކެވި ވާހަކަފުޅުގައެވެ.

އާރްޓީއެލް ޚިދުމަތަކީ ރައްޔިތުންނަށް ބަރޯސާވެވޭ، ކޮންމެ ދުވަހަކު ދެމުންދާ ޚިދުމަތެކެވެ.  ޚިދުމަތުގައި ބޭނުން ކުރަމުން އަންނަނީ އޭސީކޮށްފައި ހުންނަ، ބާރުދުވެލީގައި ދަތުރުކުރާ 50 މީހުންގެ ޒަމާނީ ލޯންޗު ފެރީތަކެވެ.