ޚަބަރު
ފަސް މިލިއަން ގަސް އިންދުމުގެ ޕްރޮގުރާމުގައި ބައިވެރިވެ، އެޗްޑީސީން އެއް މިލިއަން ގަސް އިންދަނީ

އެޗްޑީސީން އެއް މިލިއަން ގަސް އިންދުމުގެ ޕްރޮގްރާމުގައި އެޗްޑީސީގެ އެމްޑީ ބައިވެރިވެވަޑައިގަތުން- ފޮޓޯ އެޗްޑީސީ

ފަރުދުން
24 ފެބްރުއަރީ 2025، 10:31
24 ފެބްރުއަރީ 2025، 10:31
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅުތަކުގެ ތެރޭގައި ހިމެނޭ ފަސް މިލިއަން ގަސް އިންދުމުގެ ޕްރޮގުރާމުގައި ބައިވެރިވުމުގެ ގޮތުން އެޗްޑީސީން އެއް މިލިއަން ގަސް އިންދުމަށް ނިންމައިފިއެވެ.
އެޗްޑީސީގެ ބެލުމުގެ ދަށުގައިވާ ދަތުރު ދިއުމަށް ޚާއްޞަ ރަށެއް ކަމުގައިވާ ކުޑަގިރި އަށް 2 އަހަރު ފުރުން ފާހަގަ ކުރުމުގެ ގޮތުން އެރަށުގައި ބޭއްވި ރަސްމިއްޔާތެއްގައި، އެއް މިލިއަން ގަސް އިންދުމުގެ ޕްލެޖްގައި ސޮއިކުރެއްވީ އެޗްޑީސީގެ މެނޭޖިން ޑިރެކްޓަރު މުޙައްމަދު މަޢުރޫފް ޖަމީލް އެވެ.
ގަސް އިންދުމުގެ ޕްރޮގްރާމަށް ބޭނުންވާ ގަސް ހެއްދުމަށްޓަކައި އެޗްޑީސީން ވަނީ ލ. ގަމުގައި އެއްލައްކަ އަކަފޫޓުގެ ނާސަރީއެއް ޤާއިމްކުރުމަށް ވެސް ނިންމާފަ އެވެ. އެޗްޑީސީން ދަނީ އެ ކޯޕަރޭޝަންގެ ބެލުމުގެ ދަށުގައިވާ ރަށްތައް ސާފުކޮށް ފެހިކަން ގަދަ ތަންތަނަށް ހެދުމުގެ މަސައްކަތް ބާރު ސްޕީޑުގައި ކުރަމުންނެވެ. އެގޮތުން ހުޅުމާލެ ސާފުކޮށް ހުޅުމާލޭގައި ގަސްއިންދުމުގެ މަސައްކަތް ޙާއްޞަ ސަމާލުކަމެއް ދީގެން ކުރަމުން ގެންދެއެވެ.