ނޮން-ރެޒިޑެންޓް ސަފީރުކަމަށް އިތުރު ދެބޭފުޅަކު އައްޔަނުކުރުމަށް ހުށަހަޅައިފި

ނޮން-ރެޒިޑެންޓް ސަފީރުކަމަށް އިތުރު ދެބޭފުޅަކު އައްޔަނުކުރުމަށް ހުށަހަޅައިފިއެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، ރައްޔިތުންގެ މަޖިލީހަށް ހުށަހަޅުއްވާފައިވަނީ ރަޝިއަން ފެޑަރޭޝަން އަދި ކިންގްޑަމް އޮފް މޮރޮކޯއަށް ދިވެހިރާއްޖެއިން ކަނޑައަޅުއްވާ ނޮން-ރެޒިޑެންޓް ސަފީރުކަމަށެވެ. 

މަޖިލީހަށް ފޮނުއްވި ސިޓީ ފުޅުގައި ވަނީ، ތުރުކީއަށް ރާއްޖެއިން ކަނޑައަޅުއްވާފައިވާ ސަފީރު، ޗީފް އޮފް ޑިފެންސް ފޯސްގެ މަގާމުގައި ކުރިން ހުންނެވި ލެފްޓިނެންޓް ޖެނެރަލް (ރިޓަޔާޑް) އަބްދުއްރަހީމް އަބްދުއްލަތީފް - ރަޝިއަން ފެޑަރޭޝަން ރާއްޖެއިން ކަނޑައަޅާ ނޮން-ރެޒިޑެންޓް ސަފީރުކަމަށް އައްޔަނުކުރުމަށް ހުށަހަޅުއްވާ ކަމަށާއި، ސައުދީ އަރަބިއްޔާއަށް ރާއްޖެއިން ކަނޑައަޅުއްވާފައިވާ ސަފީރު އަހުމަދު ސަރީރު - ކިންގްޑަމް އޮފް މޮރޮކޯއަށް ރާއްޖެއިން ކަނޑައަޅާ ނޮން-ރެޒިޑެންޓް ސަފީރުކަމަށް އައްޔަނުކުރުމަށެވެ. މި މައްސަލަ އިތުރަށް ދިރާސާކުރުމަށް ޚާރިޖީ ގުޅުންތަކާ ބެހޭ ކޮމިޓީއަށް ވަނީ ފޮނުވާފައެވެ.

ރާއްޖެއިން ބައެއް ގައުމުތަކަށް ނޮން ރެޒިޑެންޓް ސަފީރުން އައްޔަންކުރުމަށާއި، ބައިނަަލްއަގްވާމީ ބައެއް ޖަމިއްޔާތަކަށް ދާއިމީ މަންދޫބުން ހަމަޖެއްސުމަށް ރައީސް ޑރ. މުޙައްމަދު މުއިއްޒު ވަނީ ދެހަފްތާ ކުރިންވެސް ހުށަހަޅުއްވާފައެވެ. އަދި މަޖިލީހުން ވަނީ މިބޭފުޅުންނަށް ރުހުންދެއްވާފައެވެ.