ގަރުނެއްވެފައިވާ ބޮމެއް ގޮވައި ދެ އަހަރުގެ ދެކުދިން މަރުވެއްޖެ

ކެމްބޯޑިއާގެ ސިއެމް ރީޕް ޕްރޮވިންސްގެ ސްވޭ ލިއު ޑިސްޓްރިކްޓްގައި ހުރި ކުރީގެ ހަނގުރާމައިގެ މައިދާނެއްގައި، 25 އަހަރަށްވުރެ ގިނަ ދުވަސްވެފައިވާ ކަމަށް ބެލެވޭ ރޮކެޓް-ޕްރޮޕެލްޑް ގްރެނޭޑެއް ގޮވައި، ދެ އަހަރުގެ ދެ ކުޑަކުދިން މަރުވެއްޖެއެވެ. މި ހާދިސާ ހިނގީ ހޮނިހިރު ދުވަހުއެވެ.

މަރުވި ދެ ކުދިންނަކީ ދެ އަހަރުގެ އަންހެން ކުއްޖެއް ކަމަށްވާ މުއޯ ލިސާ އާއި ހަމަ އެ އުމުރުގެ ފިރިހެން ކުއްޖެއް ކަމަށްވާ ތުމް ޔެންއެވެ. މި ދެ ކުދިން ދިރިއުޅެމުން އައީ ކްރަންހުއޯންގް ނަމަކަށް ކިޔާ އެކަހެރި ރަށެއްގައި ޖެހިޖެހިގެން ހުރި ދެ ގޭގައެވެ.

ހާދިސާ ހިނގިއިރު މި ދެ ކުދިންގެ މައިންބަފައިން ތިބީ ދަނޑުގައި މަސައްކަތް ކުރަންށެވެ. ކުދިން މަރުވެފައިވަނީ ނުގޮވާއޮތް މި ގްރެނޭޑް ފެނި، އެއާ ކުޅެން އުޅުމުގެ ތެރޭގައި ކަމަށް ބެލެވެއެވެ. ކެމްބޯޑިއަން މައިން އެކްޝަން ސެންޓަރުގެ ތަޖުރިބާކާރުން ބުނާ ގޮތުގައި މިއީ ރޮކެޓް-ޕްރޮޕެލްޑް ގްރެނޭޑެކެވެ.

މި ސަރަހައްދަކީ 1980 އާއި 1990 ގެ އަހަރުތަކުގައި ކެމްބޯޑިއާގެ ސަރުކާރުގެ ސިފައިންނާއި ކޮމިއުނިސްޓް ޚްމެރް ރޫޖްގެ އަސްކަރީންނާ ދެމެދު ވަރުގަދަ ހަނގުރާމަތަކެއް ހިނގާފައިވާ ސަރަހައްދެކެވެ. ކެމްބޯޑިއާގެ ސީ.އެމް.އޭ.ސީގެ ޑިރެކްޓަރ ޖެނެރަލް ހެންގް ރަތަނާ ވިދާޅުވި ގޮތުގައި މި ކުދިންގެ މައިންބަފައިން މި ސަރަހައްދުގައި އާބާދުވެ އުޅެން ފެށީ މިއީ ކުރީގެ ހަނގުރާމައިގެ މައިދާނެއްކަން ނޭނގިއެވެ. އަދި މި ސަރަހައްދުގައި ބިމުގައި ވަޅުލާފައި ހުރި މައިންތަކާއި ނުގޮވާ ހުރި ހަތިޔާރުތަކެއް ހުރިކަމެއްވެސް ނޭނގެއެވެ.

ކެމްބޯޑިއާގެ ރަށްފުށު ސަރަހައްދުތަކުގައި 4 މިލިއަނުން 6 މިލިއަނަށް މައިންތަކާއި ނުގޮވާ ހުރި ހަތިޔާރުތައް އަދިވެސް ހުރި ކަމަށް ލަފާކުރެވެއެވެ. މިފަދަ ހާދިސާތަކުން މީހުން މަރުވާ އަދަދު މަދުވަމުން އަންނަ ނަމަވެސް، މިދިޔަ އަހަރު 49 މީހުން މަރުވެފައިވެއެވެ. ކެމްބޯޑިއާގެ ސަރުކާރުން މި މައްސަލައަށް ހައްލެއް ހޯދުމަށް މަސައްކަތްތަކެއް ކުރަމުން ދިޔަ ނަމަވެސް، އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ބޭރު އެހީތައް  ހުއްޓާލުމާ ގުޅިގެން މި މަސައްކަތަށް ވަގުތީ ހުއްޓުމެއް އައިސްފައިވެއެވެ.