ގުޅިފަޅުން ގޯތި ލިބުނު ހުރިހާ ރައްޔިތުންނަށް ދެތިން މަސްތެރޭ ރަޖިސްޓްރީ ހަވާލުކުރާނަން: ރައީސުލްޖުމްހޫރިއްޔާ

ގުޅިފަޅުން ގޯތި ލިބުނު ހުރިހާ ރައްޔިތުންނަށް ދެތިން މަސްތެރޭ ރަޖިސްޓްރީ ހަވާލުކުރައްވާނެކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ، ދ އަތޮޅުގެ މީހުން ދިރިއުޅޭ ހުރިހާ ރަށަކަށް ކުރައްވަމުންގެންދަވާ ދަތުރުފުޅުގެ ތެރެއިން އެ އަތޮޅު މީދޫގެ ރައްޔިތުންނާ ބައްދަލުކުރެއްވުމަށް ބޭއްވެވި ޖަލްސާގައެވެ.

ރައީސުލްޖުމްހޫރިއްޔާ ވިދާޅުވީ، ގުޅީފަޅުގެ ހިއްކާފައިވާ ސަރަޙައްދުންނާއި، ނުހިއްކާ އޮތް ސަރަޙައްދުން ކުރީގެ ސަރުކާރުން ގޯތި ދޫކޮށްފައިވާކަމަށާއި، ނަމަވެސް އެ ތަނުގެ ލޭންޑް ޔޫސް ޕްލޭނަށް ގެންނެވި ބަދަލާއެކު، ގޯތި ލިސްޓުގައި ހިމެނުނު ހުރިހާ ފަރާތްތަކަށް މިހާރު ހިކިފައި އޮތް ސަރަޙައްދުން ގޯތި ދެއްވާނެކަމަށެވެ.

ގުޅިފަޅުގެ ލޭންޑް ޔޫސް ޕްލޭން ބަދަލުކޮށްފިން. އިރާދަކުރެއްވިއްޔާ ނުހިއްކާ އޮތް ސަރަހައްދުން ގޯތި ލިބިފައިވާ ހުރިހާ ރައްޔިތުންނަށްވެސް މިހާރު ހިކިފައި އޮތް ބިމުން ގޯތި ހަމަޖެހިގެންދާނެ. އެހެންވީމަ ކުރިއަށް އޮތް ދުވަސްތަކުގައ ހިއްކާފައި އޮތް ސަރަހައްދުގައި ދިރިއުޅުމަށް ބޭނުންވާ ހުރިހާ ވަސީލަތްތަކެއް ފުރިަހމަވެގެންދާނެ.

ރައީސުލްޖުމްހޫރިއްޔާ ވިދާޅުވިއެވެ.

ގުޅީފަޅުގެ ލޭންޑްޔޫސް ޕްލޭނަށް އަލިއަޅުވާލައްވައި ރައީސުލްޖުމްހޫރިއްޔާ ވިދާޅުވީ، އެއީ  ހޮސްޕިޓަލާއި އެނޫންވެސް ވަސީލަތްތައް ޤާއިމްކުރެއްވުމަށް ގެންނެވި ބަދަލެއް ކަމަށެވެ. އަދި ކުރިޔަށް އޮތް ދެތިންމަސް ތެރޭގައި ގޯތީގެ ރެޖިސްޓްރީ ހަވާލުކުރި ނަމަވެސް، ރަޖިސްޓްރީ ނުދެވޭނީ ބްރިޖުގެ މަސައްކަތަށް ބަންދުކޮށްފައިވާ ސަރަހައްދުން ގޯތި ލިބުނު ރައްޔިތުންނަށް އެކަނިކަމަށް ރައީސުލްޖުމްހޫރިއްޔާ ވިދާޅުވިއެވެ.

ނިމިދިޔަ ސަރުކާރުން ވަނީ ގުޅިފަޅުން 7 ސައިޒެއްގެ ޖުމުލަ 3520 ގޯތި ދޫކޮށްފައެވެ. އަދި ގުޅިފަޅުގެ ކުރީގެ ލޭންޑް ޔޫސް ޕްލޭނާ ޚިލާފަށް އަލުން އެކުލަވާލި ލޭންޑް ޔޫސް ޕްލޭންގައި ބިމުގެ 21 އިންސައްތަ ކަނޑައަޅާފައިވަނީ ޕާކުތަކަށާއި ގްރީން ސްޕޭސްތަކަށެވެ. އަދި ސްކޫލުތައް ހުންނަނީ މީހުން ދިރިއުޅޭ ސަރަހައްދުތަކުން 10 މިނެޓުން ހިނގާފައި ދެވޭވަރުގެ ދުރުމިނެއްގައެވެ. މީހުން ދިރިއުޅޭ ސަރަހައްދުތަކާއި މިސްކިތްތަކާ ދެމެދު ހުންނަނީ 5 މިނެޓުން ހިނގާފައި ދެވޭވަރުގެ ދުރުމިނެކެވެ. މިލޭންޑް ޔޫސް ޕްލޭންގައި މުޅި ގުޅީފަޅުގައި ވެހިކަލް ޕާކުކުރުމަށް 70،000 ޕާކިން ސަރަހައްދު ކަނޑައަޅާފައިވެއެވެ.

މީގެ އިތުރުން، ގިރާވަރު ފަޅުގެ މަޝްރޫޢަކީ ސަރުކާރަށް ގެއްލުންވާގޮތަށް ހަދާފައިވާ އެއްބަސްވުމެއްކަމަށާއި، އެ އެއްބަސްވުން ބާޠިލުކޮށް، އެ މަސައްކަތާ ސަރުކާރުން ހަވާލުވެލައްވާނެކަމަށް ވަނީ ވިދާޅުވެފައެވެ.

އަދި އުތުރު ތިލަފަޅުން ގޯތި ނުވަތަ ހައުސިން މަޝްރޫޢަށް 150 ހެކްޓަރުގެ ބިން މި އަހަރު ހިއްކަންފަށައި އަންނަ އަހަރު ނިންމަވާނެކަމަށް ވެސް ރައީސް ވިދާޅުވިއެވެ. މިއީ މާލެއާއި މާލޭގެ ރައްޔިތުންނަށް ގޯތީގެ މައްސަލަ ޙައްލުކުރުމަށް ކުރެވޭ މަސައްކަތެއްކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.