ރަމަޟާންމަހުގެ ތެރޭގައި ބޯހިޔާވަހިކަމުގެ މަޝްރޫޢުތައް ފެށޭނެ: މާލީ ވަޒީރު

މިއަހަރުގެ ރަމަޟާންމަސް ނިމޭއިރު ބޯހިޔާވަހިކަމުގެ ބައެއް މަޝްރޫޢުތައް ފެށޭނެކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ. ވަޒީރު މިހެން ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދ. އަތޮޅަށް ކުރައްވަމުން ގެންދަވާ ދަތުރުފުޅުގައި ބޯހިޔާވަހިކަމުގެ މަޝްރޫޢުތަކާ ގުޅޭގޮތުން ޕީއެސްއެމް ނިއުސްއިން ދެންނެވި ސުވާލަކަށް ޖަވާބު ދެއްވަމުންނެވެ.

މިދިޔަ ޖެނުއަރީ 29 ވަނަ ދުވަހު، ސަރުކާރުން ވަނީ ރާއްޖޭގެ 57 ރަށެއްގައި 12،000 އަށްވުރެ ގިނަ ހައުސިންގ ޔުނިޓު ޑިޒައިން އެންޑް ބިލްޑް އުސޫލުން ތަރައްޤީކޮށްދޭނެ ފަރާތްތައް ހޯދުމަށް އިޢުލާންކޮށްފައެވެ. މި މަޝްރޫޢާ ގުޅޭގޮތުން ވަޒީރު ވިދާޅުވީ، ބޯހިޔާވަހިކަމުގެ މައްސަލައަށް ހައްލެއް ގެނައުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްސަ އިސްކަމެއް ދެއްވާ ކަމެއްކަމަށެވެ.

ވަޒީރުގެ ވާހަކަފުޅުގައި، މިހާރު އިޢުލާންކޮށްފައިވާ ބޯހިޔާވަހިކަމުގެ މަޝްރޫޢުތައް ކުރިއަށްގެންދިޔުމަށް އަމިއްލަ ކުންފުނިތަކުންވެސް ޝައުގުވެރިކަން ފާޅުކުރަމުން އަންނަކަމަށް ފާހަގަކުރެއްވިއެވެ. އަދި ޤައުމުގެ އިޤްތިޞާދީ ހާލަތު ރަނގަޅުވަމުންދާކަމަށާއި، ފަތުރުވެރިކަންވެސް ކުރީ އަހަރުތަކާ އަޅާބަލާއިރު ވަރަށް ބޮޑަށް ކުރިއަރަމުންދާކަމަށް ވިދާޅުވިއެވެ.

ޚަރަދު ކުޑަކުރުމާއި ޕްރޮޖެކްޓް ރެޝަނަލައިޒް ކުރުމަށް އެޅޭ ފިޔަވަޅުތަކާއެކު މިއަހަރަކީ ތަނަވަސް އަހަރަކަށް ވެގެންދާނެ. ހަމަ އެއާއެކު މިހާރު ކުރިން ހުއްޓާލާފައިވާ މަޝްރޫޢުތައްވެސް އެކަށީގެންވާގޮތުގައި ފަށައިގަނެވޭނެ ގޮތަށްވަނީ ރޭވިފައި މާލީ ވަޒީރު މޫސާ ޒަމީރު

ސަރުކާރުގެ ބޯހިޔާވަހިކަމުގެ މަޝްރޫޢުގެ ދަށުން، އެކި ރަށްރަށުގައި 30 ހައުސިން ޔުނިޓުން ފެށިގެން 2،000 ހައުސިން ޔުނިޓާ ހަމައަށް އިމާރާތް ކުރުމަށް ވަނީ ހަމަޖެހިފައެވެ. މީގެީ އިތުރުން، ރާއްޖޭގެ އުތުރުގައި 20،000 ހައުސިން ޔުނިޓް އަދި ދެކުނުގައި 20،000 ހައުސިން ޔުނިޓްގެ މަޝްރޫޢެއް ހިންގުމަކީ ރައީސުލްޖުމްހޫރިއްޔާގެ ވަޢުދުފުޅެކެވެ. މި މަސައްކަތްތަކަށް 2.5 ބިލިއަން ރުފިޔާ މިއަހަރުގެ ބަޖެޓުގައި ހިމަނާފައިވާކަން ފާހަގަކޮށްލެވެއެވެ.