ޚަބަރު
އޮޅުހިޔާ ދިރޭތަކެއްޗާ ބެހޭ ވުޒާރާއާއި ހަވާލުކޮށްފި

އޮޅުހިޔާ ދިރޭތަކެއްޗާ ބެހޭ ވުޒާރާއާއި ހަވާލުކުރުން/ފޮޓޯ: ދަނޑުވެރިކަމާއި ދިރޭތަކެއްޗާއިބެހޭ ވުޒާރާ
ހުލާސާ
މި ފެސިލިޓީގެ ޚިދުމަތްތައް ވީހާވެސް އަވަހަށް ފެށުމަށްޓަކައި ގިނަ މަސައްކަތްތަކެއް ދަނީ ކުރަމުންް
މާލެ ސަރަޙައްދުގެ މަގުތަކުގައި އުޅޭ ބުޅާތައް ބަލަހައްޓަން ޤާއިމްކޮށްފައިވާ "އޮޅުހިޔާ" ދަނޑުވެރިކަމާއި ދިރޭތަކެއްޗާއިބެހޭ ވުޒާރާއާ ހަވާލުކޮށްފިއެވެ. މިތަނަކީ މާލެ ސިޓީ ކައުންސިލްގެ ބެލުމުގެ ދަށުގައި އޮތް ތަނެކެވެ.
މި ސަރުކާރުން 5000 އަކަފޫޓުގެ ބިމެއްގައި ޤާއިމްކޮށްފައިވާ ޕެޓް ކެއަރ ފެސިލިޓީ ނުވަތަ "އޮޅުހިޔާ" ހުޅުއްވާދެއްވާފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެވެ. ޒަމާނީ ފެންވަރަށް ތަރައްޤީކޮށްފައިވާ އޮޅުހިޔާއަކީ ދިރޭތަކެއްޗާއި ބެހޭ ވުޒާރާއިން މާލެ ސިޓީ ކައުންސިލާއި ހަވާލުކޮށްގެން ކުރިއަށް ގެންގޮސްފައިވާ މަސައްކަތެކެވެ.
ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއިން ވިދާޅުވީ، ހުޅުމާލޭގައި ޤާއިމްކޮށްފައިވާ އޮޅުހިޔާ ގެ ރަސްމީ ހުރިހާ ލިޔެކިޔުންތަކާއި ލީގަލް އެސެޓްސް ޓްރާންސްފަރގެ މަސައްކަތް ނިންމުމަށްފަހު މާލެ ސިޓީ ކައުންސިލުން އެތަން ވަނީ ރަސްމީކޮށް އެ ވުޒާރާއާއި ހަވާލުކޮށްފައިކަމަށެވެ. އަދި މާލެ ސިޓީ ކައުންސިލުން އެ ވުޒާރާއަށް މިތަން ހަވާލުކުރުމަށް އެއްބަސްވުމެއްގައި ވަނީ ސޮއިކޮށްފައެވެ. މި އެއްބަސްވުމުގައި، މާލެ ސިޓީ ކައުންސިލްގެ ފަރާތުން ސޮއިކުރެއްވީ ސެކްރެޓަރީ ޖެނެރަލް އިބްރާޙިމް ރަޝީދެވެ. އަދި ދަނޑުވެރިކަމާއި ދިރޭތަކެއްޗާބެހޭ ވުޒާރާގެ ފަރާތުން މި އެއްބަސްވުމުގައި ސޮއިކުރެއްވީ އެ ވުޒާރާގެ ސްޓޭޓް މިނިސްޓަރ ޢަލީ ޞަފްވާން އިބްރާހީމްއެވެ.
ދަނޑުވެރިކަމާއި ދިރޭތަކެއްޗާބެހޭ ވުޒާރާގެ ސްޓޭޓް މިނިސްޓަރ ޢަލީ ޞަފްވާން އިބްރާހީމް ވިދާޅުވީ، މި ފެސިލިޓީގެ ޚިދުމަތްތައް ވީހާވެސް އަވަހަށް ފެށުމަށްޓަކައި ގިނަ މަސައްކަތްތަކެއް ކުރައްވަމުން ގެންދަވާ ކަމަށެވެ. ހަމަ އެހެންމެ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާއި އެއްގޮތަށް ޢަމަލުކުރެއްވުމަށް އޮޅުހިޔާ ގެ ޚިދުމަތްތައް ވަރަށް އަވަހަށް ފަށާނެކަމަށް އޭނާ ވިދާޅުވިއެވެ. މީގެ އިތުރުން ޞަފްވާން ވިދާޅުވީ، މާލެ ސިޓީ ކައުންސިލާއި އެ ވުޒާރާއާއި އެކު ކުރިން ވެފައިވާ އެއްބަސްވުން މިހާރު އުވާލާފައިވާ ކަމަށެވެ. އަދި މިއަދު ކުރިއަށްގޮސްފައި ވަނީ މި ފެސިލިޓީ މިނިސްޓްރީގެ ބެލުމުގެ ދަށަށް ކޮމްޕްލީޓްލީ އެއްކޮށް އެސެޓް ޓްރާންސްފަރ ހެދުންކަމަށް އޭނާ ވަނީ ވިދާޅުވެފައެވެ.
އޮޅުހިޔާގައި ބުޅާތައް ކަރަންޓީނު ކުރާނެ ސަރަޙައްދަކާއި، ކްލިނިކަކާއި، ލެބޯޓްރީއެއްގެ އިތުރުން، ބުޅާތަކަށް ދޭންޖެހޭ ބޭސްތައް ހުންނަ ފާމަސީއަކާއި، އެ ބުޅާތައް އުޅޭނެ ސަރަޙައްދެއްވެސް ވަނީ ހަދާފައެވެ.