ޖަޕާނުން ރާއްޖެއަށް ކަނޑައަޅުއްވާފައި ހުންނެވި ސަފީރާއި ވަޒީރު ޑރ. އައިޝަތު ޝިހާމް ބައްދަލުކުރައްވައިފި

ޖަޕާނުން ދިވެހިރާއްޖެއަށް ކަނޑައަޅުއްވާފައި ހުންނެވި ސަފީރު، ހަރ އެކްސެލެންސީ އިޝިގާމީ ރުމީކޯ އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. އައިޝަތު ޝިހާމް އާއި ބައްދަލުކުރައްވައިފިއެވެ.

މި ބައްދަލުކުރެއްވުން ކުރިއަށް ގޮސްފައިވަނީ މިއަދުގެ ވަގުތެއްގައި، އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގައެވެ. މި ބައްދަލުކުރެއްވުމުގައި، ދިވެހިރާއްޖެއާއި ޖަޕާނާއި ދެމެދު އޮތް ޒަމާންވީ ވަރުގަދަ ގުޅުން މިހާރަށް ވުރެ އިތުރަށް ބަދަހިކުރެވޭނެ ގޮތްތަކާއި މެދު ވަނީ މަޝްވަރާކުރައްވާފައެވެ.

ހަމަ އެހެންމެ، ދެ ޤައުމުން ގުޅިގެން މަސައްކަތް ކުރެވޭނެ މުހިންމު ދާއިރާތަކާ ގުޅޭގޮތުން ދެ ބޭފުޅުން މަޝްވަރާކުރައްވާފައިވާކަމަށް އެ ވުޒާރާއިން ވަނީ ހާމަކޮށްފައެވެ. މީގެ އިތުރުން، ރާއްޖޭގައި ދިރިއުޅޭ އިސްރަށްވެހިންނަށް ދެމުންގެންދާ ޚިދުމަތްތައް މިހާރަށް ވުރެ ހަރުދަނާކޮށް، އެފަރާތްތަކަށް ދޭންޖެހޭ ފުރިހަމަ އެހީތެރިކަން ދިނުމާއި ގުޅޭގޮތުން ވެސް މި ބައްދަލުވުމުގައި ވަނީ މަޝްވަރާކުރައްވާފައެވެ. 

މި ބައްދަލުވުމުގެ ސަބަބުން، ރާއްޖޭގައި މުސްތަޤްބަލުގައި ކުރެވޭނެ މުހިންމު މަސައްކަތްކާއި، ރާއްޖޭގެ ރައްޔިތުންނަށް ފޯރުކޮށްދެވޭނެ މުހިންމު ފުރުޞަތުތަކާއި ގުޅޭ ގޮތުން މަޝްވަރާކުރެވުނުކަމަށް އެ ވުޒާރާއިން މަޢުލޫމާތު ދެއެވެ.