ޚަބަރު
ހިރިމަރަދޫގެ ރައްޔިތުން ބަދަލު ކުރުމަށް ހަނިމާދޫއިން ފުރިހަމަ އެއްބާރުލުން ލިބޭނެ ކަމުގެ އުންމީދު އެބައޮތް- ވަޒީރު

ހދ. ހިރިމަރަދޫގެ ރައްޔިތުން ހދ. ހަނިމާދޫއަށް ބަދަލު ކުރުމުގެ މަޝްވަރާތައް ފަށައިފި- ފޮޓޯ: ސޯޝަލް މީޑިއާ

ފަރުދުން
01 މާރިޗު 2025، 02:00
01 މާރިޗު 2025، 02:00
ހދ. ހިރިމަރަދޫގެ ރައްޔިތުން ހދ. ހަނިމާދޫއަށް ބަދަލު ކުރުމުގެ މަޝްވަރާތައް އެ ރައްރަށުގެ ރައްޔިތުންނާއި އެކު ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް ޢުމަރު ފައްޓަވައިފިއެވެ.
މިކަމާއި ގުޅިގެން ހދ. ހިރިމަރަދޫއާއި ހދ. ހަނިމާދޫ ކައުންސިލާއި ރައްޔިތުންނާ ވަޒީރު ވަނީ ބައްދަލު ކުރައްވާފައެވެ. ވަޒީރު އާދަމް ޝަރީފު ޢުމަރު ވިދާޅުވީ ހުރިހާ ބައްދަލުވުންތައް ވެސް ވަރަށް ކާމިޔާބު ކަމަށާއި ހިރިމަރަދޫގެ ރައްޔިތުން ތިބީ ކެތް މަދުވެފައި ކަމުގައެވެ. އަދި މިކަމަށްޓަކައި ހަނިމާދޫ ރައްޔިތުންގެ ފުރިހަމަ އެއްބާރުލުން ލިބޭނެކަމުގެ އުންމީދު އެބައޮތް ކަމަށްވެސް ވަޒީރު ވިދާޅުވެފައިވެއެވެ.
ވަޒީރު އާދަމް ޝަރީފު ޢުމަރު މިހެން ވިދާޅުވީ ހދ. ހިރިމަރަދޫއަށާއި، ހަނިމާދޫއަށް ކުރެއްވި ދަތުރަށް ފަހުއެވެ. އެމަނިކުފާނުގެ މި ދަތުރުފުޅަކީ ހިރިމަރަދޫ ރައްޔިތުން، ހަނިމާދޫއަށް ބަދަލުކުރުމާ ގުޅޭ ގޮތުން ހިރިމަރަދޫއާއި އަދި ހަނިމާދޫ ރައްޔިތުންނާ ބައްދަލުކުރެއްވުމަށް ކުރެއްވި ދަތުރުފުޅެކެވެ.
ވަޒީރުގެ މި ދަތުރުފުޅުގައި ހިރިމަރަދޫ ކައުންސިލްގެ މެންބަރުންނާއި އަދި ރައްޔިތުންނާ ވެސް ބައްދަލުކުރައްވާ މަޝްވަރާކުރައްވާފައެވެ. އަދި މިއަދު އެ މަނިކުފާނު ވަނީ ހަނިމާދޫ ކައުންސިލްގެ މެންބަރުންނާއި އަދި ރައްޔިތުންނާ ވެސް ބައްދަލުކުރައްވާ ހިރިމަރަދޫ ރައްޔިތުން އެ ރަށަށް ބަދަލުކުރުމާ މެދު މަޝްވަރާކުރައްވާފައެވެ.
ހދ. ހިރިމަރަދޫގައި އާބާދީ ކުޑަވުމުގެ ސަބަބުން ރަށަށް އެކަށީގެންވާ ތަރައްޤީ ނުލިބޭތީ އެ ރަށުގައި މިހާރު ދިރިއުޅޭ އެންމެންގެވެސް އެދުމަކީ ރައްޔިތުންގެ ތަރައްޤީއާއި ހިތްހަމަޖެހުމަށް ރަށުގެ އާބާދީ، އާބާދީ ބޮޑު އެހެން ރަށަކަށް ބަދަލުކޮށްދިނުމެވެ.