ރަމަޟާން މަހުގައި ހެޔޮޢަމަލު ކުރުން ގިނަކޮށްލާ

ރަމަޟާން މަހަކީ މުސްލިމުންގެ ހިތްތަކުގައި ޚާއްޞަ މަޤާމެއް ލިބިފައިވާ މަހެކެވެ. މި މަހަކީ ﷲ ސުބުޙާނަހޫ ވަތަޢާލާ އަޅުތަކުންނަށް ދެއްވާފައިވާ ޙާއްޞަ ހަދިޔާއެކެވެ. ރަމަޟާން މަހުގެ މާތް ކަމާއި މަތިވެރިކަން ބަޔާންކޮށް އެތަށް ޙަދީޘްތަކެއް އައިސްފައިވެއެވެ.

އަހަރަކު އެއްފަހަރު މުސްލިމުންނާއި ބައްދަލު ކުރާ މި މައްސަރުގައި ވީހާވެސް ހެޔޮ ޢަމަލު ގިނަކޮށް ތަޤުވާތެރިކަން އިސްކުރަން ޖެހެއެވެ. މި މަހުގެ ހެޔޮކަން ފުރިހަމަ ގޮތުގައި ލިބިގަތުމަށްޓަކައި އިޚްލާޞްތެރި ކަމާއެކު ރޯދައަށް ހުރުމުގެ އިތުރުން ހެޔޮ ޢަމަލުތައް ގިނަކުރުން އެދެވިގެންވެއެވެ. އެގޮތުން މި މާތް މައްސަރުގައި ތަރާވީޙް ނަމާދު ކުރުމާއި ޤުރުއާން ކިޔެވުމާއި، ޞަދަޤާތް ދިނުން ގިނަ ކުރަންވާނެއެވެ.

އިސްވެ ދެންނެވުނު ކަންކަމުގެ އިތުރުން މާތްﷲ އަށް ޒިކުރު ކުރުން އިތުރު ކުރުމާއި، ދުޢާ ކުރުން ގިނަކޮށް އިސްތިޣުފާރު ކުރުމަށް މިމަހުގައި އިތުރަށް ސަމާލުކަންދޭންވާނެއެެވެ. 

ހެޔޮ ޢަމަލާއި އަޅުކަމަކީ ހަމައެކަނި ރަމަޟާން މަހުގައި ކުރަންޖެހޭ ކަންކަމެއް ނޫނެވެ. އެހެން ނަމަވެސް ރަމަޟާން މަހުގައި ޢަމަލުތައް ބަހައްޓަންވީ ގޮތާމެދު ވިސްނާލުން މުހިންމެވެ. އަމަލުތައް ބައްޓަން ކުރުމުގައި އެންމެ މުހިންމު ކަމަކީ ކުރާ ކޮންމެ ހެޔޮކަމެއްވެސް އިޚްލާޞްތެރިކަމާއެކު ﷲއަށްޓަކައި ކުރުމެވެ. ރޯދަ ހިފުމުގައި ކެއްތެރިވުމެވެ. ރޯދައަށް ހުރެ ދޫ ރައްކާތެރި ކުރުމާއި އެހެންމީހުންނަށް އޯގާތެރިވެ އެހީތެރިވުންވެސް މުހިންމެވެ. 

ރަމަޟާން މަހުގެ ބަރަކާތްތަކުން މަންފާ ހޯދުމަށް މި މަހުގެ ކޮންމެ ވަގުތެއްގައިވެސް މަސައްކަތް ކުރަންވާނެއެވެ. ދުވާލު ވަގުތުގައި ބޭކާރު ކަންކަމުން ދުރުހެލިވެ ހެޔޮކަންތަކަށް ގޮވާލާ ހެޔޮ ޢަމަލު ގިނަ ކުރަންވާނެއެވެ. ރޭގަނޑު ވަގުތުގައި ޤިޔާމުއްލައިލް ކުރުމާއި ފާފަ ފުއްސެވުން އެދި ދުޢާކުރުމަކީ ވަރަށް މުހިންމު ކަމެކެވެ. އަދި ހަމައެހެންމެ ފަޤީރުންނާއި މިސްކީނުންނަށް އެހީތެރިވެދިނުމާއި ގުޅުންތައް ބަދަހި ކުރުމަކީ ޙާއްޞަ އިސްކަމެއް ދޭންޖެހޭ ކަންކަމެވެ.

އެންމެ ޚާއްޞަ ކަމެއްގެ ގޮތުން ރަމަޟާން  މަހަކީ ޤުރުއާން ބާވާލެއްވުނު މައްސަަރެވެ. މި މައްސަރުގައި ޤުރުއާން ކިޔެވުން އިތުރު ކުރަން ޖެހެއެވެ. ކޮންމެ ނަމާދަކަށްފަހު ޞަފްޙާ އެއްގެ މިންވަރު ނަމަވެސް ކިޔުން މޮޅު އިިތުރުވެގެން ވެއެވެ. އެންމެ އެދެވިގެން ވަނީ މި މާތް މައްސަރުގައި ޙަތިމްކޮށް ނިންމާލުމެވެ. 

ޙަޤީޤަތުގައިވެސް ރަމަޟާން މަހަކީ ހެޔޮކަމުގެ މައްސަރެވެ. މިމަހުގެ ލާބައާއި މަންފާ ހޯދުމަށްޓަކައި ކޮންމެ މީހަކުވެސް މަސައްކަތް ކުރަންވާނެއެވެ. މާތްﷲ އަޅުގަނޑުމެން އެންމެންނަށްވެސް މި މަހުގެ ހެޔޮކަންތައްތައް ކުރުމުގެ ތައުފީޤު ދެއްވާށިއެވެ.