ސޯޝަލް މިޑީއާ މެދުވެރިކޮށް ކާބޯތަކެތި އިޝްތިހާރު ކުރުމަށް ހުއްދަ ނަގާކަށް ނުޖެހޭނެ

ސޯޝަލް މިޑީއާ މެދުވެރިކޮށް ކާބޯތަކެތީގެ ޕޯސްޓުތައް އިޝްތިހާރު ކުރުމަށް ހުއްދަ ނަގަން ނުޖެހޭނެކަން ސިއްޙީ ވުޒާރާއިން ވިދާޅުވެއްޖެއެވެ.

ސިއްޚީ ވުޒާރާއިން ނެރެފައިވާ ކާބޯތަކެތި އިޝްތިހާރުކުރުމާ ބެހޭ ޤަވާއިދުގައި"އެއްވެސް ބާވަތެއްގެ ކާބޯއެއްޗެއް އިޝްތިހާރުކުރުމަށް އެދޭ ފަރާތްތަކުން އެ އިޝްތިހާރެއް އޮތޯރިޓީއަށް ހުށަހަޅައި އޮތޯރިޓީގެ ހުއްދަ ލިޔުމުން ހޯދައިގެން މެނުވީ އިޝްތިހާރެއްގެ ގޮތުގައި ބޭނުންކޮށްގެން ނުވާނެ" ކަމަށް ބަޔާންކޮށްފައިވެއެވެ.

އެވުޒާރާއިން ފަހުން ނެރުނު ބަޔާނެއްގައި ވަނީ، ކެފޭ އަދި ރެސްޓޯރަންޓު ފަދަ ތަންތަނުގައި ބޭނުންކުރާ އަދި ކާބޯތަކެތީގެ ޚިދުމަތް ނުވަތަ ވަކި ކާބޯއެއްޗެއް ލިބެންހުރިކަމަށްބުނެ އާމްދަނީ ހޯދުމަށް ގޭގައި ކާބޯތަކެތި ތައްޔާރުކުރާ ފަރާތްތަކުން ނުވަތަ އެހެންފަރާތްތަކުންވެސް  ސޯޝަލް މީޑިއާ މެދުވެރިކޮށް އިޝްތިހާރުކުރާނަމަ ހުއްދަ ނަގަން ނުޖެހޭނެކަމަށެވެ.

ގަވާއިދުގައި ބުނާ ގޮތުން އިސްތިހާރު ކުރުމަށް އޯޑިއޯ ނުވަތަ ވީޑިއޯ އިޝްތިހާރަކަށް 1،500ރ. ނަގާނެ އެވެ. އަދި ވީޑިއޯ ނުވަތަ އޯޑިއޯ ނޫން އިޝްތިހާރުތަކަށް 1،000ރ. ނަގާނެ އެވެ. ނަމަވެސް ފާސްކުރުމަށް ހުށަހަޅާ އިޝްތިހާރަކީ ކާބޮނޭޓަށް ޑްރިންކްސް ނުވަތަ އެނާޖީ ޑްރިންކްސް ނަމަ އެއީ، ކޮންމެ މީޑިއަމެއްގެ އިސްތިހާރެއް ކަމަށްވިޔަސް އެ އިޝްތިހާރުގެ ފީއަކީ 3،000ރ. ކަމަށް ގަވާއިދުގައި ވެއެވެ. ގަވާއިދާ ޚިލާފަށް އެއްވެސް ތަނަކުން އިޝްތިހާރު ކޮށްފިނަމަ ކުށެއްގެ ކުޑަ ބޮޑުމިނަށް ބަލައި ފުރަތަމަ ޖޫރިމަނާ ކުރަނީ 10،000ރ. އިންނެވެ. ކުށް ތަކުރާރުކޮށްފި ނަމަ އެއްލައްކަ ރުފިޔާއިން ޖޫރިމަނާކުރާއިރު، ތިންވަނައަށް ކުށް ތަކުރާރު ކޮށްފިނަމަ ތިން ލައްކަ ރުފިޔާއިން ޖޫރިމަނާ ކުރާނެ އެވެ.

ސިއްޙީ ވުޒާރާއިން ވިދާޅުވީ، ކާބޯތަކެތި އިޝްތިހާރުކުރުމާއި ކާބޯތަކެތި ތަހުލީލުކުރާ ލެބޯޓަރީއަކުން ދޫކުރާ ރިޕޯޓެއްގެ ނުވަތަ ރިފަރަލް ލެބޯޓަރީއަކުން ދޫކޮށްފައިވާ ސެޓްފިކެޓް އޮފް އެނަލިސިސްއެއްގެ ނުވަތަ އެއިން ލިޔުމެއްގެ ބޭނުންކޮށްފިނަމަ ފިޔަވަޅު އަޅާނެއެވެ.

އިޝްތިހާރުތަކަށްހުއްދަ ދޫކުރަނީ ތިން އަހަރަށެވެ. އަދި ފާސްކުރި އިޝްތިހާރަށް ބަދަލެއް ގެނެސްފިނަމަ އާ އިޝްތިހާރެއްގެ ގޮތުގައި ފާސްކުރަންޖެހެނެކަމަށްވެސް އައު ޤަވާއިދުގައިވެއެވެ.