އިނގިރޭސި އެފްއޭ ކަޕް: ފުލަމްއިން މެންޗެސްޓަރ ޔުނައިޓެޑް ކަޓުވާލައިފި

އިނގިރޭސި އެފްއޭ ކަޕްގެ 5ވަނަ ބުރުގައި ފުލަމް އިން މެންޗެސްޓަރ ޔުނައިޓެޑު ކަޓުވާލުމަށްފަހު ކުއާޓާ ފައިނަލުން ޖާގަ ހޯދައިފިއެވެ.

މެޗުގެ ފުރިހަމަ ވަގުތު ހަމަވިއިރު ނަތީޖާ 1-1 އިން އެއްވަރުވެފައި ވުމުން، މެޗުގެ ނަތީޖާ ކަނޑައެޅީ ޕެނަލްޓީ ޖަހައިގެންނެވެ. އަދި ޕެނަލްޓީ ޝޫޓް-އައުޓްގައި ފުލަމްގެ ހީރޯއަކީ އެ ޓީމުގެ ގޯލް ކީޕަރު ބާރންޑް ލެނޯއެވެ. އޭނާ ވަނީ ޔުނައިޓެޑުގެ ދެ ޕެނަލްޓީ މަތަކޮށްފައެވެ.

ޕެނަލްޓީ ޝޫޓް-އައުޓްގައި ކޮންމެ ޓީމަކުން ވެސް އެ ޓީމެއްގެ ފުރަތަމަ ތިން ޕެނަލްޓީ ކާމިޔާބުކުރިއިރު، މެންޗެސްޓަރ ޔުނައިޓެޑަށް ނާކާމިޔާބުވީ، ހަތަރު ވަނައަށް ވިކްޓަރ ލިންޑެލޮފް ފޮނުވާލި ޕެނަލްޓީއެވެ. އޭގެ ފަހުން ފުލަމްގެ ހަތަރުވަނަ ޕެނަލްޓީ އެންޓޮނީ ރޮބިންސަން ކާމިޔާބުކުރިއިރު، ފުލަމްގެ ޖަރުމަން ކީޕަރު ލެނޯ ވަނީ ޔުނައިޓެޑުން ފަސްވަނައަށް ފޮނުވާލި ޖޮޝުއާ ޒާރކްޒީގެ ޕެނަލްޓީ ވެސް މަތަކޮށްފައެވެ.

މެޗުގައި ފުރަތަމަ ލީޑު ނެގީ ވެސް ފުލަމްއެވެ. ފުރަތަމަ ހާފުގެ އިތުރު ވަގުތުގައި އެ ޓީމަށް މި ގޯލު ކާމިޔާބުކޮށްދިނީ ކެލްވިން ބަސޭއެވެ. މިއީ އެ ޓީމަށް ލިބުނު ކޯނަރަކުން ތަނަވަސްވި ފުރުސަތެއްގައި، ރޮޑްރީގޯ މުނީޒް ފަހިކޮށްދިން ފުރުސަތެކެވެ.

މެންޗެސްޓަރ ޔުނައިޓެޑަށް މެޗުގެ ނަތީޖާ ހަމަހަމަކޮށްދިނީ މެޗު ނިމެން 19 މިނެޓަށް ވެފައިވަނިކޮށް، ޓީމުގެ ކެޕްޓަން، ބްރޫނޯ ފެނާންޑޭޒްއެވެ. މި ގޯލަށް އެސިސްޓުކޮށްދިނީ ޔުނައިޓެޑުގެ ކަނާތް ފަރާތުން ފަހަތަށް ކުޅެމުން އަންނަ ޑިއެގޯ ޑަލޮޓްއެވެ.

ޕެނަލްޓީއަށް ނުގޮސް، މެޗު ކާމިޔާބުކުރާނެ ރަގަޅު ފުރުސަތުތަކެއް ދެ ޓީމަށް ވެސް ވަނީ ލިބިފައެވެ. އެގޮތުން ފުލަމްގެ އެމައިލް ސްމިތު ފޮނުވާލި ބޯޅައާއި ޔުނައިޓެޑުގެ 17 އަހަރުގެ ޗިޑޯ އޮބީ ފޮނުވާލި ބޯޅަތައް ވަނީ ދެކޮޅުން ވެސް ކީޕަރުން މަތަކޮށްފައެވެ.