ޚަބަރު
އޮޅުހިޔާގައި ދެ ހަފްތާތެރޭ މެޑިކަލް އަދި ވެޓް ކެއަރ ފެސިލިޓީގެ މަސައްކަތް ފެށޭނެ: ޑރ. މާރިޔާ
ކެޓް ޝެލްޓަރ އެއް/ ފޮޓޯ: އިންޓަރނެޓް
މަގުމަތީގައި އުޅޭ ބުޅާތައް ބެލެހެއްޓުމަށް ޤާއިމްކުރި "އޮޅުހިޔާ"ގެ މެޑިކަލް އަދި ވެޓް ކެއަރ ފެސިލިޓީގެ މަސައްކަތް ކުރިއަށް އޮތް 2 ހަފްތާގެ ތެރޭގައި ފެށޭނެކަމަށް ދިރޭތަކެއްޗާ ބެހޭ ވަޒީރު ޑރ. މަރްޔަމް މާރިޔާ ވިދާޅުވެއްޖެވެ.
" އޮޅުހިޔާ" ފެސިލިޓީއަށް މިހާރު ރޭވިފައިވާ ޕްލޭންތަކާ ބެހޭގޮތުން ދެއްވި ވިޑިއޯ މެސެޖެއްގައި ވާހަކަފުޅުދައްކަވަމުން ވަޒީރު ވިދާޅުވީ، ބުޅާ ފެސިލިޓީއަށް ބުޅާތައް ނެގިގެންދަނީ ވަކި ބައިބަޔަށްކަމަށެވެ. ބުޅާތަކަށް ދޭންވާ ފަރުވާއާއި އެހެނިހެން ޚިދުމަތްތައް ޤާއިމްކުރުމުގެ މަސައްކަތް ކުރަމުންދާކަމަށް ވެސް ވަޒީރު ވިދާޅުވިއެވެ. އެގޮތުން މެޑިކަލް ފެސިލިޓީއާއި ޑޮކްޓަރ ފެސިލިޓީ އަދި ވެޓް ކެއަރ ފެސިލިޓީގެ ޙިދުމަތް ފެށުމަށް ތައްޔާރުވަމުދާކަމަށް ވިދާޅުވިއެވެ.
މިނިސްޓަރ ޑރ. މަރްޔަމް މާރިޔާ "އޮޅުހިޔާ" ފެސިލިޓީއާ ބެހޭގޮތުން ވާހަކަދައްކަވައި، މިހާރު ރޭވިފައިވާ ޕްލޭންތަކާ ބެހޭގޮތުން ވާހަކަދެއްކެވުން pic.twitter.com/renvJYxCUl
— Ministry of Agriculture and Animal Welfare (@MAAWmv) March 1, 2025
އަޅުގަނޑުމެންނަށް ދެ ހަފްތާއެއްހާ ދުވަސް ތެރޭގައި ވެޓް ކެއަރ ފެސިލިޓީ އަދި މެޑިކަލް ފެސިލިޓީގެ ޚިދުމަތް ފަށައިގަނެވޭނެ. އޭގެ ފަހުން ހަމަ މަޑު މަޑުން މާލެ ސަރަހައްދުގައި އުޅޭ ބުޅާތައް ގެނެސް ދޭން ޖެހޭ ޚިދުމަތް ދެމުން ދާނަން.
ވަޒީރު މާރިޔާ ވިދާޅުވިއެވެ.
ބުޅާދެކެ ލޯބިވާ ފަރާތްތަކާއި، އެންޖީއޯ ތަކުން ވޮލަންޓިއަރ ކުރަން ބޭނުންވާ ފަރާތްތަކަށް އެ ފުރުޞަތު އޮތްކަން އަންގާ އެފަރާތްތަކުން މި މަސައްކަތުގައި އެއްބާރުލުން ދިނުމަށް ވަޒީރު މާރިޔާ ވަނީ އެދިފައެވެ.
