ޚަބަރު
ހިލޭ ދަތުރު ކުރެވޭ ކާޑެއް ވިއްކާ ކަމަށްބުނެ އާރު.ޓީ.އެލް ނަމުގައި ސްކޭމެއް ހިންގާތީ ސަމާލުވާން އެދިއްޖެ
އާރު.ޓީ.އެލް ނަމުގައި ސްކޭމެއް ހިންގާތީ ސަމާލުވާން އެދިއްޖެ- ފޮޓޯ: އެމްޓީސީީ
އާރުޓީއެލުން ހިލޭ ދަތުރުކުރެވޭ "ސްމާޓް ކާޑެއް" ވިއްކާ ކަމަށް ބުނެ ފޭސްބުކް ޕޭޖެއް މެދުވެރިކޮށް ސްކޭމެއް ހިންގާތީ ސަމާލުވާން އެމްޓީސީސީން އިލްތިމާސްކޮށްފި އެވެ.
އެކްސްގައި ކުރެއްވި ޕޯސްޓެއްގައި އެމްޓީސީސީން ވިދާޅުވެފައިވަނީ އެ ކުންފުނީގެ ދަށުން ހިންގަމުން އަންނަ އާރުޓީއެލްގެ ނަމުގައި ސްކޭމެއް ހިންގަމުންދާކަން ފާހަގަކުރެވިފައިވާ ކަމަށެވެ. އެގޮތުން "މޯލްޑިވްސް ޕަބްލިކް ޓްރާންސްޕޯޓް"ގެ ނަމުގައި ހިންގާ ފޭސްބުކް ޕޭޖަކުން އާރްޓީއެލް މެދުވެރިކޮށް ތިން މަސްދުވަސް ވަންދެން ހިލޭ ދަތުރުކުރެވޭ "ސްމާޓް ކާޑެއް "ވިއްކުމަށް މަސައްކަތް ކުރަމުންދާކަމަށެވެ.
އެމްޓީސީސީން ވިދާޅުވެފައިވަނީ އެ ކުންފުނިން އައު ޚިދުމަތެއް ތަޢާރަފް ކުރާނަމަ އެ ކަމެއް ރަސްމީކޮށް ފެށުމުގެ ކުރިން ކުންފުނީގެ އޮފިޝަލް ސޯޝަލް މީޑިއާ އަދި އެހެނިހެން މީޑިއާ ޗެނަލްތަކުން އެކަމުގެ މައުލޫމާތު ހިއްސާކުރާނެ ކަމަށެވެ.އެ ފޭސްބުކް ޕޭޖުގައި ހިންގަމުން ގެންދާ އެއްވެސް ހަރަކާތަކީ އެމްޓީސީސީ އާއި އާރުޓީއެލްއާ ވެސް އެއްވެސް ގުޅުމެއް ނެތް ކަމެއް ކަމަށް އެމްޓީސީސީން ބުންޏެވެ. އެހެންކަމުން އެ ޕޭޖުގައި ހިންގަމުންދާ ސްކޭމްއަކީ އެމްޓީސީސީ އަދި އާރުޓީއެލްއާ އެއްވެސް ގުޅުމެއް ނެތް ކަމެއް ކަމަށް އެމްޓީސީސީން މަޢުލޫމާތު ދެއެވެ.
އެމްޓީސީން އިތުރަށް ވިދާޅުވެފައިވަނީސްކޭމްތައް އާންމުވެފައިވާއިރު، މި ކަންކަމަށް ސަމާލުވުމުގެ ގޮތުން އެމްޓީސީސީ ނުވަތަ އާރްޓީއެލްގެ ނަމުގައި އެއްވެސް ފަރާތަކުން ފޮނުވާ ލިންކްތަކަށް ސަމާލުވުމަށާއި އެފަދަ ފަރާތްތަކާ އެކު އެއްވެސް ފައިސާގެ މުއާމަލާތެއް ނުކުރުމަށް އެންމެހާ ކަސްޓަމަރުންނަށް ނަސޭހަތްތެރިވާކަމަށެވެ.
އެމްޓީސީސީން ވަނީ އެ ކުންފުންޏަށް ރައްޔިތުން ކުރާ އިތުބާރުގެ ބޭނުން ނަހަމަ ގޮތުގައި ހިފައި، ނުހައްގުން ފައިސާ ހޯދުމަށް ކުރަމުންދާ ކަންކަން ހަރުކަށި އިބާރާތުން ކުށްވެރިކޮށްފައެވެ.
