ސަޢުދީ އިން ދިވެހިރާއްޖެއަށް 10 ޓަނުގެ ކަދުރު ހަދިޔާކޮށްފި

ސަޢުދީ ޢަރަބިއްޔާގެ މިނިސްޓްރީ އޮފް އިސްލާމިކް އެފެއާޒް ދަޢުވާ އެންޑް ގައިޑެންސްއިން ދިވެހިރާއްޖެއަށް 10 ޓަނުގެ ކަދުރު ހަދިޔާކޮށްފިއެވެ.

މިކަމަށްޓަކައި  އިސްލާމީ ކަންތައްތަކާ ބެހޭ ވުޒާރާގައި ބޭއްވި ރަސްމިއްޔާތެއްގައި އިސްލާމީ ކަންތައްތަކާ ބެހޭ ވުޒާރާގެ ފަރާތުން ކަދުރާއި ހަވާލުވެލެއްވީ ވަޒީރު ޑރ. މުޙައްމަދު ޝަހީމް އަލީ ސަޢީދުއެވެ.

ސަޢުދީ ޢަރަބިއްޔާގެ މިނިސްޓްރީ އޮފް އިސްލާމިކް އެފެއާޒް ދަޢުވާ އެންޑް ގައިޑެންސްއިން 10 ޓަނުގެ ކަދުރު ހަދިޔާކޮށްދެއްވީތީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ވަނީ ސަޢުދީ ޢަރަބިއްޔާގެ ވުޒާރާއަށް ޝުކުރު އަދާ ކުރައްވާފައެވެ. މި ރަސްމިއްޔާތުގައި ދިވެހިރާއްޖޭގައި ހުންނަ ސަޢުދީ ޢަރަބިއްޔާ އެމްބަސީގެ އިސްވެރިން ވަނީ ބައިވެރިވެލައްވާފައެވެ.

ނިިމިދިޔަ އަހަރު ތަކުގައި ސަޢުދީއިން ރާއްޖެއަށް ކޮންމެ އަހަރަކުވެސް 50 ޓަނުގެ ކަދުރު ހަދިޔާ ކޮށްފައިވެެއެވެ. ކޮންމެ އަހަރެއްގެ ރަމަޟާން މަހާ ދިމާކޮށް ސަޢުދީ ޢަރަބިއްޔާއިން ރާއްޖެއަށް ކަދުރު ހަދީޔާކުރެއެވެ. މި ކަދުރު ރާއްޖޭގެ ހުރިހާ ހިސާބެއްގެ ގޭބިސީތަކަށް ބެހުމުގެ މަސައްކަތް ކުރިއަށްގެންދަނީ އިސްލާމީ ކަންތައްތަކާ ބެހޭ ވުޒާރާއިންނާއި ރަށު ކައުންސިލް ތަކުންނެވެ.