ދުނިޔެ
ޣައްޒާއަށް އެހީ އެތެރެކުރުން ހުއްޓާލުމަށް އިސްރާއީލުން ނިންމި ނިންމުން ދިވެހި ސަރުކާރުން ކުށްވެރިކޮށްފި

ޣައްޒާގެ ރައްޔިތުންވަނީ ހައިހޫނުކަން ތަޙައްމަލް ކުރަން ޖެހިފައި
ޣައްޒާއަށް ހިއުމެނިޓޭރިއަން އެއިޑް- (އިންސާނީ އެހީ)އެތެރެކުރުން ހުއްޓާލުމަށް އިސްރާއީލު ސަރުކާރުން ނިންމި ނިންމުން ދިވެހި ސަރުކާރުން ކުށްވެރިކޮށްފިއެވެ.
މިނިސްޓްރީ އޮފް ފޮރިން އެފެއަރޒްއިން ނެރުނު ނޫސް ބަޔާނެއްގައި ޙިއްސާކޮށްފައިވާ ގޮތުން، ޣައްޒާއަށް އިންސާނީ އެހީ އެތެރެވުން ހުއްޓާލުމަށް އިސްރާއީލުން ނިންމި ނިންމުން ދިވެހި ސަރުކާރުން ހަރުކަށި އިބާރާތުން ކުށްވެރިކުރެއެވެ. އަދި މިއީ ހަނގުރާމަ ހުއްޓާލުމުގެ އެއްބަސްވުމާއި، ބައިނަލްއަޤްވާމީ ޤާނޫނުތަކާ، އިންސާނީ ޙައްޤުތަކާ ކަނޑައެޅިގެން ޚިލާފު ޢަމަލެއްކަމަށް ވެސް ހާމަކޮށްފައިވެއެވެ.
މި ނޫސްބަޔާނުގައި އިސްރާއީލުން ހިންގާ މިފަދަ ބޮޑެތި ޖަރީމާތައް ހުއްޓާލުމަށާއި، ބައިނަލްއަޤްވާމީ މުޖުތަމަޢުތައް ޖަވާބުދާރީކުރުވުމުގެ ނިޒާމުތައް ޒިންމާދާރު ކުރުވުމަށް ވެސް ގޮވާލާފައިވެއެވެ. އަދި ޣައްޒާގެ ހުރިހާ ސަރަޙައްދަކަށް ރައްކާތެރިކަމާއެކު، ދެމެހެއްޓެނިވި ގޮތެއްގައި އަދި ހުއްޓުމެއްނެތި އިންސާނީ އެހީތެރިކަން ފޯރުކޮށްދިނުމަށް ބައިނަލްއަޤްވާމީ މުޖުތަމަޢަށް ރާއްޖެއިން ވަނީ ގޮވާލާފައެވެ.
މި ހަމަނުޖެހުމަށް ދެމެހެއްޓެނިވި އަދި ޢަދުލުވެރި، ޞުލްޙަވެރި ޙައްލެއް ލިބޭނީ 1967 ގެ ކުރީގެ ސަރަޙައްދުތަކުގެ މައްޗަށް ބިނާކޮށް، އިރުމަތީ ޤުދުސްއަކީ ވެރިކަންކުރާ ރަށްކަމުގައި ކަނޑައަޅައި، މިނިވަން އަދި މުސްތަޤިއްލު ފަލަސްޠީނު ދައުލަތެއް ޤާއިމްކުރެވިގެން ކަމުގައި ދިވެހިރާއްޖެއިން ދެކޭ ކަމަށް ވެސް ބަޔާނުގައި ފާހަގަ ކޮށްފައިވެެއެވެ.
އެހީގެ ޓްރަކްތައް ޣައްޒާއަށް ވަނުން ހުއްޓުވީ، ފަލަސްތީނާ ދެމެދު ހަނގުރާމަ ހުއްޓާލުމަށް ވެވުނު އެއްބަސްވުމުގެ ފުރަތަމަ މަރުހަލާ ނިމުމުން ކަމަށާއި، އަދި ދެވަނަ މަރުހަލާއަށް ދިޔުމާމެދު ހަމާސްއާއެކު އެއްބަސްވުމަކަށް ނާދެވުމުގެ ސަބަބުން ކަމުގައި ފަހަނައަޅާފައިވާ އިސްރާއީލުގެ ބޮޑުވަޒީރު، ބެންޖަމިން ނަތަންޔާހޫގެ އޮފީހުން ބުނެފައިވެއެވެ.
ޣައްޒާއަށް ކާބޯތަކެއްޗާއި އިންސާނީ އެހީ ވެއްދުން އިޒްރޭލުން މަނާކޮށް، އެހީގެ ޓްރަކްތައް ޣައްޒާއަށް ވަނަނުދީ ހިފަހައްޓާފައިވުމުން ޣައްޒާގެ ރައްޔިތުން ބަނޑަށްޖެހި މަރުވެދާނެކަމުގެ ބިރު ވަނީ ހީވެފައެވެ.