ފްލެޓަށް ޝަކުވާ ހުށައަޅާއިރު ޕޯޓަލްގައި ލިޔެވޭ މިންވަރު 3000އަށް އިތުރުކޮށްފި

"ގެދޮރުވެރިޔާ" ސްކީމްގެ ދަށުން ފްލެޓް ލިބޭ ފަރާތްތަކުގެ ލިސްޓަށް ޝަކުވާ ހުށައަޅާއިރު ޕޯޓަލްގައި ލިޔެވޭ މިންވަރު 3000އަށް އިތުރުކޮށްފިއެވެ.

 ދައުލަތުގެ މީޑިއާ ޕީއެސްއެމްގައި ވާހަކަ ދައްކަވަމުން މިނިސްޓަރ އޮފް ސްޓޭޓް ފޯރ ކޮންސްޓްރަކްޝަން، ހައުސިން އެންޑް އިންފްރާ ސްޓްރަކްޗަރ އިބްރާހިމް ނަޒީމް ވިދާޅުވީ  މާދަމާ އިން ފެށިގެން ޕޯޓަލުގައި ލިޔެވޭ މިންވަރު އިތުރު ކުރަން ނިންމާފައިވާ ކަމަށެވެ.

މިމަހުގެ ނިޔަލަށް ފްލެޓް ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލާފައިވާއިރު،ޕޯޓަލް މެދުވެރިކޮށް ޝަކުވާ ހުށައަޅާއިރު ޕޯޓަލްގައި ލިޔެވޭ މިންވަރު ކަމުގައިވާ 1500 ލަފްޒު ކުޑަކަމަށް އާންމުން ދެކެއެވެ.  ސްޓޭޓް މިނިސްޓަރު ވިދާޅުވީ މިދިޔަ ހަތަރު ދުވަސްތެރޭ ހާހަކަށް ވުރެ ގިނަ ޝަކުވާ ހުށައަޅާފައިވާ ކަަމަށާ އާންމުންގެ އެންމެ ބޮޑު ކަންބޮޑުވުމަކީ ޕޯޓަލުން ޝަކުވާ ހުށައަޅަން ޖެހޭއިރު ޝަކުވާގެ ގޮތުގައި ލިޔެވޭ މިންވަރު މަދުވުން ކަމަށެވެ.

އެހެން ކަމުން މިހާރު ލިޔެވޭ 1500 ލަފުޒުގެ ބަދަލުގައި 3000 ލަފުޒަށް އިތުރު ކުރަން ނިންމާފައިވާ ކަމަށް ނަޒީމް ވިދާޅުވި އެވެ. އެއާއެކު މާދަމާ އިން ފެށިގެން އެ އަދަދަށް ލިޔެވޭނެ ކަމަށްވެސް ނާޒިމް ވިދާޅުވިއެވެ.

ފްލެޓު ދޭން ކަނޑައަޅާފައިވާ 4000 މީހުންގެ ލިސްޓް ބެލުމުން ޝަރުތު ހަމަވީ 1،820 މީހުން ކަމަށް ސަރުކާރުން ވަނީ ބުނެފަ އެވެ. އަދި އެ ލިސްޓް މިހާރު ވަނީ އާންމުކޮށްފަ އެވެ. މި ލިސްޓަށް ޝަކުވާ ހުށަހެޅުމުގެ ފުރުސަތު މިހާރު ވަނީ ހުޅުވާލާފައެވެ.