ޞައްޙަ ވިިސާގައި މަސައްކަތްކުރާ ބިދޭސީންގެ ޢަދަދު އިތުރުވެއްޖެ- އިމިގްރޭޝަން

ޞައްޙަ ވިިސާގައި މަސައްކަތްކުރާ ބިދޭސީންގެ ޢަދަދު އިތުރުވެއްޖެ ކަމަށް އިމިގްރޭޝަންއިން ވިދާޅުވެއްޖެއެވެ.

ގަވާއިދާ ޚިލާފަށް އުޅޭ ބިދޭސީން ހޯދުމަށް މިރަމަޟާން މަހު މޯލްޑިވްސް އިމިގްރޭޝަނުން ކުރިއަށް ގެންދިޔަ އޮޕަރޭޝަން އެއްގައި ގިނަ ޢަދަދެއްގެ ބިދޭސީން  ބަލާ ފާސްކޮށްފައި ވެއެވެ. އިމިގްރޭޝަނުން ވިދާޅުވެފައި ވަނީ ގަވާއިދާ ޚިލާފަށް އުޅޭ ބިދޭސީން ހޯދުމަށް މި ރަމަޟާން މަހާ ދިމާކޮށް މާލޭ ލޯކަލް މާރުކޭޓާއި ދަތުރުވެރިންގެ މާރުކޭޓު ބަލައި ފާސްކޮފައިވާ ކަމަށެވެ. އެގޮތުން ދީފައިވާ ހުއްދައިގެ ބޭރުން މަސައްކަތްކުރަމުންދިޔަ 2 ބިދޭސީއަކު މިއޮޕަރޭޝަންގައި، އިމިގްރޭޝަންގެ ބެލުމުގެ ދަށަށް ގެންގޮސްފައިވާކަމަށް އިމިގްރޭޝަނުން ވިދާޅުވިއެވެ.

އިމިގްރޭޝަނުން ވިދާޅުވީ މި އޮޕަރޭޝަންގެ ދަށުން ބަލާ ފާސްކުރެވުނު އިރު އެ ބިދޭސީއެއްގެ ޞައްޙަ ވިސާގައި، އެ ބިދޭސީއަކު މަސައްކަތް ކުރަންޖެހޭ ތަނުގައި މަސައްކަތް ކުރަމުން ގެންދާކަން ފާހަގަ ވެފައިވާކަމަށެވެ. އަދި ކުރި އާއި އަޅާ ބަލާއިރު ޞައްޙަ ވިސާގައި މަސައްކަތް ކުރާ ބިދޭސީންގެ އަދަދު އިތުރު ވަމުންދާކަންވެސް އިމިގްރޭޝަނުން ފާހަގަ ކޮށްފައިވެއެވެ. 

 މާލެ ސަރަހައްދުގައި ޤަވާއިދާ ޚިލާފަށް ކުދި އަދި މެދު ފަންތީގެ ވިޔަފާރި ކުރަމުން އަންނަ ބިދޭސީން ދެނެގަނެ، އެފަރާތްތަކަށް އިމިގްރޭޝަނަށް ހާޒިރުވުމަށް އަންގައި، އަދި ޤަވާއިދާ ޚިލާފަށް ބިދޭސީން ލައްވައި މަސައްކަތްކުރުވާ ދިވެހިންނަށް ލިޔުމުން ނަސޭހަތްދިނުން މިދިޔަ އަހަރުގެ ތެރޭގައި އިމިގްރޭޝަނުން ވަނީ ފަށާފައެވެ. 

ޤަވާއިދާ ޚިލާފަށް ރާއްޖޭގައި އުޅެމުންދާ ބިދޭސީންގެ މައްސަލައަކީ ރާއްޖޭގައި ޙައްލެއް ލިބިފައި ނުވާ މައްސަލައެކެވެ.  މިހާރުގެ ސަރުކާރުން މިކަން ހުއްޓުވުމަށް އަޅަމުންދާ ފިޔަވަޅުތަކުގެ ސަބަބުން ޤަވާއިދާ ޚިލާފަށް އުޅޭ ބިދޭސީންގެ މައްސަލައަށް ހައްލު ލިބެމުން އަންނަތަން ފެނެއެވެ.