ޚަބަރު
ޤަވާއިދާ ޚިލާފަށް އުޅެމުންދިޔަ 4 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފި
އިމިގްރޭޝަނުން ހިންގި އޮޕަރޭޝަންގެ ތެރެއިން- ފޮޓޯ: މޯލްޑިވްސް އިމިގްރޭޝަން
މާލޭގައި ޤަވާއިދާ ޚިލާފަށް އުޅެމުންދިޔަ 4 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
މޯލްޑިވްސް އިމިގްރޭޝަނުން ވިދާޅުވީ މާލޭގައި ހިންގަމުންދާ މާރުކޭޓު ތަކަށް ޚާއްޞަ އޮޕަރޭޝަނެއް ކުރިއަށް ގެންގޮސްފައިވާކަމަށެވެ. އެގޮތުން ރޯދައާއި ދިމާކޮށް މާލޭގައި ހިންގާ މާރުކޭޓު ތަކަށް ބިދޭސީން އަތް ގަދަކޮށް ޤަވާއިދާ ޚިލާފަށް ވިޔަފާރި ކުރާ ކަމުގެ ރިޕޯޓް އިމިގްރޭޝަން ވޮޗް އަށް ލިބިފައިވާކަމަށް އިމިގްރޭޝަނުން ވިދާޅުވިއެވެ.
އެހެންކަމުން 2025 ފެބްރުވަރީ 18 ވީ ދުވަހު މާލޭގައި ހިންގަމުންދާ ކުދި މާރުކޭޓުތައް ބަލާފާސްކުރި ކަމަށް ވިދާޅުވިއެވެ. މި އޮޕަރޭޝަންގައި ފަސް ތަނެއް ބަލައި 2 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންދެވުނު ކަމަށް ވިދާޅުވި އެވެ.
އިމިގްރޭޝަނުން ވިދާޅުވީ މި އޮޕަރޭޝަނަށް ފަހު މާލޭގައި ހުންނަ ލޯކަލް މާރުކޭޓާއި ދަތުރުވެރިންގެ މާރުކޭޓުގައި ޚާއްޞަ އޮޕަރޭޝަނެއް ކުރިއަށް ގެންދަން އަމާޒު ހިއްޕެވި ކަމަށެވެ. އެގޮތުން އޮޕަރޭޝަންގެ 2 ދުވަސް ކުރިން ފެބްރުވަރީ 22 ވަނަ ދުވަހު އިމިގްރޭޝަންގެ އޮފިސަރުން މާރުކޭޓަށްގޮސް ބިދޭސީން މަސައްކަތް ކުރަމުންދާ ގޮޅިތައް ސިއްރުން ފާހަގަކޮށްފައިވާކަމަށް ވިދާޅުވިއެވެ.
އެއަށްފަހު ފެބްރުވަރީ 24 ވަނަ ދުވަހު ހަމަ އެ ގޮޅިތައް ބަލާ ފާސްކޮށް ބިދޭސީންގެ ލިޔެކިޔުންތައް ޗެކް ކުރެއްވި ކަމަށް އިމިގްރޭޝަނުން ވިދާޅުވިއެވެ. މީގެ ތެރެއިން ހުއްދައިގެ ބޭރުން މަސައްކަތް ކުރަމުންދިޔަ ދެ ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެވިފައިވާކަން އިމިގްރޭޝަނުން ފާހަގަ ކުރެއްވިއެވެ.
އިމިގްރޭޝަނުން ވިދާޅުވީ މި އޮޕަރޭޝަންގެ ދަށުން ބަލާ ފާސްކުރެވުނު އިރު އެ ބިދޭސީއެއްގެ ޞައްޙަ ވިސާގައި، އެ ބިދޭސީއަކު މަސައްކަތް ކުރަންޖެހޭ ތަނުގައި މަސައްކަތް ކުރަމުން ގެންދާކަން ފާހަގަ ވެފައިވާކަމަށެވެ. އަދި ކުރި އާއި އަޅާ ބަލާއިރު ޞައްޙަ ވިސާގައި މަސައްކަތް ކުރާ ބިދޭސީންގެ އަދަދު އިތުރު ވަމުންދާކަންވެސް އިމިގްރޭޝަނުން ފާހަގަ ކޮށްފައިވެއެވެ.
