ވިޔަފާރި / ޚަބަރު
ކެނދިކުޅުދޫ "ދި މެންގްރޫވް އައިލެންޑް" ގެ ނަމުގައި މާކެޓްކުރަން ފަށައިފި

ކެނދިކުޅުދޫ
ލޯކަލް ޓުއަރިޒަމަށް ކެނދިކުޅުދޫ ފައްކާކުރުމުގެ ގޮތުން އެ ރަށް "ދި މެންގްރޫވް އައިލެންޑް" ގެ ނަމުގައި ޕްރޮމޯޓްކޮށް މާކެޓްކުރަން ފަށައިފިއެވެ.
ކެނދިކުޅުދޫ ކައުންސިލް މެމްބަރު ހަސަން މުޙައްމަދު ވިދާޅުވީ، މިހާރުވެސް ޖަރުމަނުވިލާތުގައި ކުރިއަށްދާ އައިޓީބީ ބާލިންގައި ކެނދިކުޅުދޫ ޕްރޮމޯޓްކުރުމުގެ މަސައްކަތް ކުރަމުންދާ ކަމަށެވެ.
ކެނދިކުޅުދޫގައި މިހާރު ޓުއަރިސްޓުންނަށް ހޯމްސްޓޭ ކުރުމުގެ ހުއްދަ ލިބިފައިވާއިރު، އެ ރަށުގައި 70 އެނދުގެ ލަގްޒަރީ ގެސްޓް ވިލާތަކެއް އަޅައި ހިންގުމަށް ހަވާލުކޮށްފައަވާލުކޮށްފައިވާ ކަމަށް ހަސަން މުޙައްމަދު ވިދާޅުވިއެވެ. މީގެ އިތުރުން 70 އެނދުގެ ސިޓީ ހޮޓަލެއްގެ މަސައްކަތްވެސް ބާރު ސްޕީޑުގައި ކުރިއަށްދާ ކަމަށާއި، މި ހޮޓަލުގެ އެއްބައި މި އަހަރު ހުޅުވުމަށް ތައްޔާރުވަމުންދާ ކަމަށްވެސް އޭނާ ވިދާޅުވިއެވެ.
ފާއިތުވި ފެބްރުއަރީ 29 ވަނަ ދުވަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކެނދިކުޅުދޫއަށް ކުރެއްވި ދަތުރުފުޅުގައި، އެ ރަށުގެ ރައްޔިތުންނަށް، ކުދި އަދި މެދުފަންތީގެ ވިޔަފާރިތައް އުފައްދައިގެން، އިކޯ ޓޫރިޒަމްގެ ފުރުޞަތުތައް ފަހިކޮށްދެއްވާނެ ކަމަށް ވަނީ ވިދާޅުވެފައެވެ.
ގުދުރަތީ ގޮތުން މުއްސަނދި ކެނދިކުޅުދޫގައި 9 ކުޅި އޮތް އިރު، މީގެ ތެރޭގައި 400 ފޫޓުން ފެށިގެން 3000 ފޫޓާ ދެމެދުގެ ދިގުމިން ހުރި 3 ކުޅި ހިމެނެއެވެ. މި ކުޅިތަކުގައި ކަނޑޫފަލާއި، އާންމުކޮށް ނުފެންނަ ގިނަ ދޫނިސޫފާސޫފި އުޅެއެވެ.