Ads by Exprox

ޚަބަރު

ސުއޫދު ޢަމަލު ކުރެއްވީ ކުރިން ވެސް ގެންގުޅުއްވި ސިޔާސީ އެކްޓިވިސްޓް އުސޫލަށްކަން ސާފުވެއްޖެ- ޕީއެންސީ

ސުއޫދު ޢަމަލު ކުރެއްވީ ކުރިން ވެސް ގެންގުޅުއްވި ސިޔާސީ އެކްޓިވިސްޓް އުސޫލަށްކަން ސާފުވެއްޖެ- ޕީއެންސީ

ވެރިކަން ކުރާ މައި ޕާޓީ ޕީއެންސީގެ ލޯގޯ- ފޮޓޯ: ޕީއެންސީ ފޭސްބުކް ޕޭޖް

farudhun logo

ފަރުދުން

05 މާރިޗު 2025، 03:47

05 މާރިޗު 2025، 03:47

މިދިޔަ ހަފްތާގައި ސަސްޕެންޑްކުރި ސުޕްރީމް ކޯޓުގެ ތިން ފަނޑިޔާރުންގެ ތެރޭގައި ހިމެނިވަޑައިގަންނަވާ ފަނޑިޔާރު ހުސްނުއްސުއޫދު އަމަލު ކުރެއްވީ އޭނާ ފަނޑިޔާރު ކަމަށް ވަޑައިގެންނެވުމުގެ ކުރިން ވެސް ގެންގުޅުއްވި ސިޔާސީ އެކްޓިވިސްޓް އުސޫލު ކަން ސާފުވެއްޖެ ކަމަށް ވެރިކަން ކުރާ މައި ޕާޓީ ޕީއެންސީން ބުނެފިއެވެ.

ޕީއެންސީން ނެރެފައިވާ ނޫސްބަޔާނެއްގައި ވަނީ، ސުޕްރީމް ކޯޓުގެ ފަނޑިޔާރު ހުސްނުއްސުއޫދު އިއްޔެ އިސްތިއުފާދެއްވުމުގައި އަމަލު ކުރެއްވި ގޮތުން ފަނޑިޔާރު ސުއޫދު ރާއްޖޭގެ އެންމެ މަތީ ކޯޓުގެ ފަނޑިޔާރު ކަމުގައިވެސް ގެންގުޅުއްވީ އެ މަގާމަށް ވަޑައިގަތުމުގެ ކުރިންވެސް ގެންގުޅުއްވި ސިޔާސީ އެކްޓިވިޒަމްގެ އުސޫލުތައްކަން ސާފުވެފައިވާ ކަމަށެވެ.

ހުސްނުއްސުއޫދު ވަނީ ސަސްޕެންޑު ކުރައްވާފައިި ވަނިކޮށް އިއްޔެ މަގާމުން އިސްތިއުފާ ދެއްވާފަ އެވެ.  ސުއޫދު ވަނީ ސުޕްރީމް ކޯޓުގެ ހުރިހާ ފަނޑިޔާރުންނަށް ބިރު ދައްކާ، ކޯޓަށް ހުށަހަޅާފައިވާ މައްސަލަ ރައީސް އެދިވަޑައިގަންނަވާ ގޮތަށް ނިންމަން ނުފޫޒު ފޯރުވާކަމަށް ތުހުމަތު ކުރައްވާފައެވެ. މިކަމަށް ރައްދު ދެއްވާ ޕީއެންސީން ނެރުނު ނޫސް ބަޔާނުގައި ބުނެފައިވަނީ އިސްތިއުފާ ދެއްވުމަށް ޖޭއެސްސީއަށް ސިޓީ ފޮނުއްވުމުގެ ބަދަލުގައި ރައީސަށް ސިޓީ ފޮނުއްވީ އެމަނިކުފާނުގެ އިސްތަށިފުޅުގައި އެއްވެސް އަސްލެއް ނެތް ތުހުމަތުތަކެއް އެޅުއްވުމަށް ކަމަށެވެ. 

ޕީއެންސީން ބުނީ ފަނޑިޔާރުކަމުގެ މަގާމުގައިވެސް އަދި މަގާމުން ވަކިވެ ވަޑައިގަތުމުގައިވެސް ފަނޑިޔާރުން ސިޔާސީ ވިސްނުމާއި އެކްޓިވިޒަމްގެ އުސޫލު އިސްކުރުމަކީ ގާނޫނީ ނިޒާމުތައް ދަންނަ ކަމެއް ނޫން ކަމަށެވެ. އަދި އެއީ މުޅި ޖުޑިޝަރީގެ އިތުބާރު ގެއްލި ޝަރުއީ ދާއިރާ ސިޔާސީ ވާދަވެރިކަމުގެ ތެރެޔަށް ވަނުމަށް ހިތްވަރު ލިބޭ ފަދަ މައްސަލައެއް ކަމަށްވެސް  ޕީއެންސީން ބުނެއެވެ.

އެއާއެކު ޖޭއެސްސީ ފަދަ މިނިވަން މުވައްސަސާތައް މިނިވަން ކަމާއި މުސްތަގިއްލު ކަމާއެކު ހިންގުމުގެ ފުރުސަތު ރައީސް މުއިއްޒު ވަނީ ފަހިކޮށްދެއްވާފައިވާ ކަމަށާއި، ރައީސް ޑރ. މުހައްމަދު މުއިއްޒު ޝަރުޢީ ދާއިރާއަށް ނުފޫޒެއް ނުފޯރުވާ ކަމަށާއި އަދި ދުސްތޫރީ ނިޒާމު ހިނގަމުންދަނީ ރަނގަޅަށް ކަމަށްވެސް ޕީއެންސީން ބުނެފައި  ވެއެވެ.

މި ލިޔުން ކިޔާލުމުން

Ads by MSS