ޑްރައިވިންގ ލައިސަންސް ތިއަރީ އިމްތިޙާނު ޓްރާންސްޕޯޓުން ކުރިއަށް ގެންދަން ފަށަނީ

 މިއަދު (6 މާރިޗު 2025) އިން ފެށިގެން އެއްގަމު އުޅަނދު ދުއްވުމުގެ ލައިސަންސްގެ ތިއަރީ އިމްތިޙާނު ޓްރާންސްޕޯޓު މިނިސްޓްރީގެ ފަރާތުން ކުރިއަށް ގެންދަން ނިންމައިފިއެެވެ.

ޓްރާންސްޕޯޓް މިިނިސްޓްރީން ވިދާޅުވީ މިއީ ރައްޔިތުންނަށް ފޯރުކޮށްދެމުންދާ ޚިދުމަތްތަކުގެ ތެރެއިން އެއް ޚިދުމަތް ކަމަށާއި މިހާތަނަށް މި އިމްތިޙާނު ކުރިއަށް ގެންދިޔައީ މޯލްޑިވްސް ޕޮލިޓެކްނިކުން ކަމުގައެވެ. ނަމަވެސް މިއަދުން ފެށިގެން މި ޚިދުމަތް ފޯރުކޮށްދޭނީ މިނިސްޓްރީ އޮފް ޓްރާންސްޕޯޓުންނެވެ. މި ބަދަލާއެކު، އިމްތިޙާނު ހެދުމުގެ އިންތިޒާމުތައް އަދި ކަމާގުޅޭ އެހެނިހެން ކަންކަން ބަލަހައްޓާނީ ސީދާ މިނިސްޓްރީން ކަމުގައި ވިދާޅުވެފައިވެއެވެ.

ގްރޭޓަރ މާލެ ސަރަޙައްދުން މި ޚިދުމަތަށް އެދޭ ފަރާތްތަކުން ސަވާރީ އިންފޮމޭޝަން މެނޭޖްމަންޓް ސިސްޓަމް (ސިމްސް) މެދުވެރިކޮށް އެޕްލިކޭޝަން ހުށަހަޅާއިރު، ތިއަރީ އިމްތިޙާނު ހަދާ ސެންޓަރެއްގެ ގޮތުގައި މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން އިޚްތިޔާރު ކުރަންވާނެ ކަމަށް މިނިސްޓްރީން ވިދާޅުވިއެވެ. މި ބަދަލުގެ ސަބަބުން، ޑްރައިވިންގ ލައިސަންސް ހެދުމުގެ މަރުޙަލާތައް އެއް ތަނަކުން ކުރިއަށް ގެންދެވޭނެއެވެ.