ރާއްޖެ އެތެރެކުރަން އުޅުނު 400 ވޭޕް ސްޓިކް ކަސްޓަމްސްއިން އަތުލައިގެންފި

ކަނޑުމަގުން ރާއްޖެެއަށް އެތެރެކުރަން އުޅުނު 400 ވޭޕް ސްޓިކް ކަސްޓަމްސް އިން އަތުލައިގެންފި އެވެ.

ކަސްޓަމްސްއިން އެކްސްގައި ކުރެއްވި ޕޯސްޓެއްގައި ބުނެފައިވަނީ ވޭޕް ޝިޕްމަންޓް އަތުލައިގަތީ ކަނޑުމަގުން ވިޔަފާރި ބަނދަރަށް އެތެރެކުރި ޝިޕްމަންޓެއް ފާސްކުރިއިރު ޝައްކުކުރެވޭ ކަންތައްތަކެއް ހުރުމުން އިތުރަށް ބެލިއިރު ކަމަށެވެ.

އެގޮތުން އެ ޝިޕްމަންޓް ކަސްޓަމްސްއަށް ޑިކްލެއާކޮށްފައިވަނީ ޖެނެރަލް ކާގޯގެ ގޮތުގައި ކަމަށް ބުނެފައި ވެއެވެ. އެ މުދަލުގެ ތެރޭގައި ވޭޕް ސްޓިކް ފޮރުވާފައި ހުރިކަމަށް ޝައްކުވެގެން އިތުރަށް ބެލުމުން 400 ވޭޕް ހިމެނޭ ޕެކޭޖު ފެނުނު ކަމަށާއި އެއީ ހަތަރު ވޭޕް ހިމެނޭ 100 ޕެކް ކަމަށްވެސް ކަސްޓަމްސްއިން ބުނެއެވެ.

400 ވޭޕް ސްޓިކް އެތެރެ ކުރަން މަސައްކަތް ކޮށްފައިވާއިރު ނިމިދިޔަ ހަފްތާގެ ތެރޭގައި ފުލުހުން ވެސް ވަނީ ވޭޕް ވިއްކާ ދެ ތަނެއް ބަލާފާސްކޮށް ބިދޭސީއެއް ހައްޔަރުކޮށްފަ އެވެ. ބަލައި ފާސްކުރިއިރު 84 ވޭޕް ކާޓްރިޖް އަދި ވޭޕް ވިއްކައިގެން ހޯދާފައިވާ ކަމަށް ތުހުމަތު ކުރެވޭ ފައިސާ ފުލުހުންގެ ބެލުމުގެ ދަށަށް ވަނީ ގެންގޮސްފައެވެ.

ދުންފަތް ކޮންޓްރޯލްކުރުމާ ބެހޭ ގާނޫނުގެ ދަށުން ރާއްޖެއަށް ވޭޕާއި އީ-ސިނގިރޭޓު އެތެރެކުރުމަކީ މިދިޔަ ޑިސެމްބަރު 15 އިން ފެށިގެން މަނާ ކަމެކެވެ.