ޕާކިންގ ސްލޮޓް ކުއްޔަށް ދިނުން ހުއްޓާލަން ސިޓީ ކައުންސިލަށް އަންގައިފި

 މާލޭގެ އެއްވެސް ސަރަހައްދަކުން ޕާކިންގ ސްލޮޓް ކުއްޔަށް ނުވަތަ އެނޫންވެސް ގޮތަކަށް ދިނުން ހުއްޓާލުމަށް ޓްރާންސްޕޯޓް މިނިސްޓްރީން މާލޭ ސިޓީ ކައުންސިލަށް އަންގައިފިއެވެ.

މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ކުރި ޢިއުލާނެއްގައި ބުނެފައިވަނީ މިއީ މާލޭގެ މަގުތަކުގައި އާންމު ބޭނުމަށް އޮންނަ ޖާގަ ކުޑަވެ، މަގުތައް ބޭނުންކުރުމުގައި ދަތިވެފައިވާކަމަށާއި، ޒަރޫރީ ބޭނުންތަކަށް އުޅަނދުތަކުގައި މާލޭގެ ތަންތަނަށް ގޮސް، ވަގުތީ ގޮތުން ޕާކުކުރާނެ ޖާގައެއް ނުލިބުމުގެ ދަތިކަން ހައްލުކުރުމަށް މަގުފަހިކުރުމަށާއި، ރައްޔިތުންނަށް ހަމަހަ ގޮތުގައި މަގުތަކުގައިވާ އާންމު ޖާގަތަށް ބޭނުން ހިފޭގޮތަށް ކަންކަން ފަހިކުރުމަށް އެޅި ފިޔަވަޅެއް ކަމަށެެވެ. 

އެގޮތުން 23 ސެޕްޓެންބަރު 2024ން ފެށިގެން، މާލޭ ސިޓީ ކައުންސިލުން، މާލޭގެ އެއްވެސް ސަރަހައްދަކުން ޕާކިންގ ސްލޮޓް ކުއްޔަށް ނުވަތަ އެނޫންވެސް ގޮތަކަށް ދިނުން ހުއްޓާލުމަށް އެ ކައުންސިލަށް އަންގާފައިވާކަމަށެވެ. އަދި މާލޭ ސިޓީ ކައުންސިލުން މި ތާޜީޚާ ހަމަޔަށް ކުއްޔަށް ދޫކޮށްފައިވާ ސްލޮޓްތަކުގެ މުއްދަތު ހަމަވުމުން، އެ ޖާގަތައްވެސް، އެފަދައިން ނުވަތަ އެ ނޫން ގޮތަކަށް ދޫކުނުކުރުމަށްވެސް އެ ކައުންސިލަށް އަންގާފައިވާކަމަށް އެ އިއުލާނުގައި ބަޔާންކޮށްފައިވެއެވެ.

މާލެއާއި ހުޅުމާލޭ މަގުތަށް ރައްކާތެރި ސާފު ތާހިރު ތަންތަނުގެ ގޮތުގައި ހެދުމަށް ސަރުކާރުގެ އިދާރާތަކުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން މަގުތައް ސާފުކުރުމާއި ގިނަ ދުވަސްވީ ވެހިކަލްތައް ނަައްތާލުމުގެ އިތުރުން ނުގަވައިދުން ހުރި ވެހިކަލްތައް ޤަވައިދަށް ފެއްތުމުގެ މަސައްކަތްވެސް ވަނީ ފަށާފަައެވެ.