ދިރާގު ގުޑިފެސްޓް އިއްޔެ ހަވީރު މާލޭގެ އުސްފަސްގަނޑުގައި ބާއްވައިފި

ކޮންމެ އަހަރެއްގެ ވެސް ރަމަޟާން މަހެއްގައި ދިރާގުން ކުރިއަށްގެންދާ ގުޑިފެސްޓް އިއްޔެ ހަވީރު މާލޭގެ އުސްފަސްގަނޑުގައި ބާއްވައިފިއެވެ.

މިއަހަރުގެ ގުޑިފެސްޓް ކުރިއަށް ގެންގޮސްފައިވަނީ ދިރާގާއި މާލެ ސިޓީ ކައުންސިލުން ގުޅިގެންނެވެ. އިއްޔެ ކުރިއަށް ދިޔަ ގުުޑިފެސްޓުގައި ބައިވެރިވުމަށް މާލެ ސިޓީގެ މޭޔަރ އާދަމް އާޒިމް ވަނީ އުސްފަސްގަނޑަށް ޒިޔާރަތްކޮށްފައެވެ. އަދި ގުޑިފެސްޓް ޙަރަކާތް ފެށުމަށް އެންމެ ފުރަތަމަ ގުޑި އަރުވާފައިވަނީ މޭޔަރ އާޒިމް އެވެ.

މި ޙަރަކާތް ކުރިއަށް ގެންގޮސްފައިވަނީ، އިއްޔެ ހަވީރު 17:00 އިން ފެށިގެން 18:00 އާއި ހަމައަށެވެ. މި ޙަރަކާތުގައި އެކި އުމުރުފުރާތަކުގެ ކުދިން ބައިވެރިވެފައިވާ ކަމަށް ދިރާގުން މަޢޫލޫމާތުދެއެވެ. އަދި މި އިވެންޓުގައި ބައިވެރިވުމަށް އެ ސަރަޙައްދަށް ދިޔަ ކޮންމެ ކުއްޖަކަށް ވެސް ވަނީ ހިލޭ ގުޑިއެއް ދީފައެވެ.  ދިރާގުގެ ގުޑިފެސްޓުގެ ފުރަތަމަ އިވެންޓު އިއްޔެ ކާމިޔާބުކަމާއެކު ނިންމާލާފައިވާއިރު، ނިމިދިޔަ އަހަރުގައިވެސް ދިރާގުން ބޭއްވި ގުޑިފެސްޓުތަކަށް ވެސް ވަނީ ޢާންމުންގެ ފަރާތުން ބޮޑު ތަރުހީބެއް ލިބިފައެވެ.

ދިރާގުން ބާއްވާ މި ގުޑިފެސްޓަކީ ކޮންމެ އަހަރެއްގެ ވެސް ރަމަޟާން މަހު ދިވެހީންގެ މެދުގައި އޮންނަ ޒަމާންވީ އާދައެއްކަމަށްވާ ގުޑި އެރުވުމުގެ ހަރަކާތާއި ގުޅިގެން ކުރިއަށްދާ ފެސްޓެކެވެ. އަދި މި ޙަރަކާތް ބޭއްވުމުގެ އެންމެ ބޮޑު އެއް މަޤްސަދަކީ، ގުޑި އެރުވުނަށް ކުދިން އަހުލުވެރިކުރުން ކަމަށް ދިރާގުން މަޢުލޫމާތުދެއެވެ. އެހެންކަމުން، މިދިޔަ އަހަރެކޭ ވެސް އެއްގޮތަށް މިއަހަރުވެސް ދިރާގު ގުޑިފެސްޓް ރާއްޖޭގެ އެކި ކަންކޮޅުތަކުގައި ބޭއްވުމަށް ހަމަޖެހިފައިވާ ކަމަށް ދިރާގުން ބުނެއެވެ.