ޤައުމީ ސަލާމަތާއި ގުޅުންހުރި މައްސަލައެއްގައި ބަޔަކު ހައްޔަރުކޮށްފި

ޤައުމީ ސަލާމަތާއި ގުޅުންހުރި ޚާއްޞަ އޮޕަރޭޝަނެއްގައި ތަންތަން ބަލައި ފާސްކޮށް، 3 މީހަކު ހައްޔަރުކޮށްފިއެވެ.

ދިވެހި ފުލުހުންގެ ޚިދުމަތާއި، ސިފައިން ގުޅިގެން ކުރިއަށް ގެންދިޔަ މި އޮޕަރޭޝަން މާލޭގައި ކުރިއަށް ގެންގޮސްފައިވަނީީ ރޭ 23:00 ހާއިރެވެ. ފުލުހުންނާއި ސިފައިން ކުރިއަށް ގެންދިޔަ މި އޮޕަރޭޝަންގައި މަގުމަތީގެ ބައެއް އުޅަދުތައްވެސް ހުއްޓުވައި ބަލާ ފާސްކޮށްފައިވެއެވެ.

ފުލުހުން ވިދާޅުވީ މިއީ ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެން ކުރިއަށްގެންދިޔަ އޮޕަރޭޝަނެއްކަމަށެވެ. އަދި މި އޮޕަރޭޝަނުގެ ތެރެއިން 3 މީހަކު ހައްޔަރުކޮށް، އެ މީހުންނާއި ގުޅުންހުރި ތަންތަން ބަލާ ފާސްކުރަމުންދާކަށެވެ. މިއީ ގައުމީ ސަލާމަތާއި ގުޅުން އޮތް މައްސަލައަކަށް ވުމުން ހާމަކުރެވެން އޮތް ވަރަކުން ހާމަކުރަމުންދާނެ ކަމަށް ސަލާމަތީ ބާރުތަކުން ވަނީ ބުނެފައެވެ.

މާލޭގެ އިތުރުން ސަލާމަތީ ބާރުތަކުން ވަނީ ހުޅުމާލޭގައިވެސް ފުލުހުންނާއި ސިފައިން މި އޮޕަރޭޝަން ކުރިއަށް ގެންގޮސްފައިވެއެވެ. އެގޮތުން ބައެއް ތަންތަންވެސް ބަލާ ފާސްކޮށް، ބައެއް ތަކެތި ސަލާމާތީ ބާރުތަކުގެ ބެލުމުގެ ދަށަށް ގެންގޮސްފައި ވެެއެވެ. ސަލާމަތީ ބާރުތަކުން ހިންގި މި އޮޕަރޭޝަން ނިންމާލިކަމަށް އަދި ހާމަކުރައްވާފައެއްނުވެއެވެ.