ލޯނު ނުދައްކައިގެން މާލޭގެ ދެ ގެއެއް ނީލަމުގައި ވިއްކާލަން އިއުލާންކޮށްފި

ބޭންކް އޮފް މޯލްޑިވްސް، ބީއެމްއެލް އިން ނަގާފައިވާ  ލޯނަކަށް ފައިސާ ނުދައްކައިގެން މާލޭގެ ދެ ގެއެއް ނީލަމުގައި ވިއްކާލަން އިއުލާންކޮށްފިއެވެ.

ބީއެމްއެލްއިން ކޮށްފައިވާ އިއުލާނުގައި ނީލަމުގައި ވިއްކާލަން ނިންމާފައިވަނީ  މ. ނާއިންފަރުއާގެ އާއި މ. ބީޗްކޯނާއެވެ. ނާއިންފަރުއާގެ އަކީ 792 އަކަފޫޓުގެ ގެއެކެވެ. ނީލަމުގައި އެ ގެ ވިއްކާލުމުގެ ނީލަން ފެށޭ އަގަކީ 13 މިލިއަން ރުފިޔާ އެވެ. އެ ގެ ގަންނަން ނީލަން ހުށަހެޅުމުގެ މުއްދަތު ހަމަވާނީ އަންނަ މަހު 10 އަށެވެ. ވިއްކާލަން އިއުލާނު ކޮށްފައިވާ ދެވަނަ ގެ ކަމަށްވާ މ. ބީޗްކޯނާ އަކީ 927.33 އަކަފޫޓުގެ ގެއެކެވެ. އެ ގެ ވިއްކާލަން ނީލަން ފެށޭ އެންމެ ދަށް އަގަކީ 23.8 މިލިއަން ރުފިޔާ އެވެ. އެ ގެއަށް ގަތުމަށް އަގު ހުށަހެޅުމުގެ މުއްދަތު ހަމަވާނީ އަންނަ މަހުގެ 15 ވަނަ ދުވަހު އެވެ.

މި ދެ ގެ ވެސް ނީލަމުގައި ވިއްކާލަން ހަމަޖެހިފައިވަނީ އެންމެ ބޮޑު އަގެއް ހުށަހަޅާ ފަރާތަކަށެވެ. ބޭންކުން ބުނީ އެންމެ ބޮޑު އަގެއް ހުށަހެޅި ފަރާތް ކަނޑައަޅާނީ ހުށަހަޅާ އަގު އެންމެ މަތީ އަގުގެ ގޮތުގައި ބަދަލެއް ނައިސް ފަސް ދުވަހުގެ މުއްދަތަކަށް އޮތުމުން ކަމަށެވެ.

ބޭންކުގެ އިއުލާނުގައި ބުނެފައިވަނީ ނީލަން ނިމުމުން އެންމެ މަތީ އަގު ހުށަހަޅާ ފަރާތަކަށް އެކަން އަންގާނެ ކަމަށާއި، ބޭންކުން އެކަން އަންގާ ތާރީޚުން ފެށިގެން ސަރުކާރު ބަންދު ދުވަސްތައް ނުހިމަނައި 10 ދުވަހުގެ ތެރޭގައި، ނުވަތަ ބޭންކުން އިތުރުކޮށްދޭ މުއްދަތެއްގެ ތެރޭގައި އެ ފަރާތަކުން ހުށަހެޅި ޖުމްލަ އަގަށްވާ ފައިސާ ބޭންކަށް ދައްކަން ޖެހޭނެ ކަމަށެވެ. 

މި މުއްދަތުގެ ތެރޭގައި ފައިސާ ނުދައްކައިފިނަމަ އެ ހުށަހެޅުން ބާތިލް ކުރުމަށް ފަހު ދެވަނައަށް އެންމެ މަތީ އަގު ހުށަހެޅި ފަރާތައް ނީލަން ނިންމާލުމުގެ ނުވަތަ ނީލަން އަލުން ފެށުމުގެ ހައްގު ބޭންކަށް ލިބިގެން ވެއެވެ.