ޙޫރަލްޢީންގެ ވާހަކަތައް ދެއްކުމަކީ ބޭކާރުކަމެއް ކަމުގައި ޞިފަކުރުމީ ވަރަށް ދަށުދަރަޖައިގެ ޢަމަލެއް: ޝައިޚް ސަމީރް

ޝަރުޢީ ޢިލްމުގެ އަލިފުބާވެސް ނުދަނެތިބެ ފަތުވާ މަޖްލީހުގެ އިޚުުތިޞާޞު ތެރެއަށް ވަދެ، އެބޭފުޅުންނަށް ހަޖޫޖަހައި، ފަތުވާ މަޖްލީހުގެ ހައިބަތު ވައްޓާލައި ކީރިތި ޤުރްއާނުގެ ޞަރީޙަ ނައްޞުގައި ބަޔާންކުރައްވާފައިވާ ޙޫރަލްޢީންގެ ވާހަކަތައް ދެއްކުމަކީ ބޭކާރުކަމެއް ކަމުގައި ޞިފަކުރުމީ ވަރަށް ދަށުދަރަޖައިގެ ޢަމަލެއް ކަމަށް ޢައްޝައިޚް އަޙުމަދު ސަމީރު ވިދާޅުވެއްޖެއެވެ.  

ޝައިހް ސަމީރުގެ މިހެން ވިދާޅުވީީ އެމްޑީޕީގެ އަންހެނުންގެ ރޫހުގެ ރައީސާ ރޮޒައިނާ އާދަމް ކުފުރުގެ ވާހަކަތަކެއް ދެއްކުމާއި ގުޅިގެންނެވެ. ޓީވީ ޕްރޮގްރާމެއްގައި ވާހަކަ ދައްކަމުން ރޮޒައިނާ ބުނީ ރާއްޖޭގެ ފަތުވާ ކޮމެޓީން ދައްކަނީ "ޙޫރަލްޢީންގެ"  ވާހަކަ ކަހަލަ ބޭކާރު ވާހަކަ ކަމަށެވެ. 

މިކަމާއި ގުޅިގެން ޝައިޚް ސަމީރު ކުރެއްވި ޕޯސްޓެއްގައި ވިދާޅުވީ ކީރިތި ޤުރްއާނުގައި ބަޔާންކުރައްވާފައިވާ ކަންކަމާ ބެހޭގޮތުން ވާހަކަދެއްކުމަކީ ސަމާސާއެއް ކަމުގައި ނުހެދުމަށާއި ފަތުވާ މަޖްލީހުގެ އިޚުތިޞާޞްގެ ތެރެއަށް ނުވަނުމަށް ރޮޒައިނާއަށް އިލްތިމާސް ކުރައްވާ ކަމުގައެވެ.

އެއާއެކު އަންހެނުން ފަނޑިޔާރުކަން ކުރުމުގެ  ޙުކުމް ސާފުކޮށް ދެއްވުން އެދި ރައްޔިތުން މަޖްލީހުގެ މެންބަރަކު ފަތުވާ މަޖްލީހުގައި އެދުމުން 9 ޖުލައި 2019 ގައި އެ މަޖްލީހުން ދެއްވާފައި ފަތުވާއަކީ  ޝަރުޢީ އަދި ޤާނޫނީ ގޮތުން އެމަޖްލީހުގެ ޒިންމާގެ ތެރެއިން ދެއްވާފައިވާ ފަތުވާއެއްކަމަށްވެސް ޝައިޚް ވިދާޅުވެފައި ވެއެވެ. 

ޝަރުޢީ ޢިލްމުގެ އަލިފުބާވެސް ނުދަނެތިބެ ފަތުވާ މަޖްލީހުގެ އިޚުުތިޞާޞު ތެރެއަށް ވަދެ، އެބޭފުޅުންނަށް ހަޖޫޖަހައި، ފަތުވާ މަޖްލީހުގެ ހައިބަތު ވައްޓާލައި ކީރިތި ޤުރްއާނުގެ ޞަރީޙަ ނައްޞުގައި ބަޔާންކުރައްވާފައިވާ ޙޫރަލްޢީންގެ ވާހަކަތައް ދެއްކުމަކީ ބޭކާރުކަމެއް ކަމުގައި ޞިފަކުރުމީ ވަރަށް ދަށުދަރަޖައިގެ ޢަމަލެއް

ޝައިޚް ސަމީރު ވިދާޅުވިއެވެ.

މީގެ އިތުރުން، މިފަދަ  ވާހަކަތަކަކީ  ދީނީގޮތުން ނުހަނު ޚުޠޫރަތްތެރި ކަންކަމަށް ވުމުގެ އިތުރުން އެއީ ދިވެހިރައްޔިތުންގެ ދީނީ އެއްބައިވަންތަކަން ޙިމާޔަތްކުރުމުގެ ޤާނޫނާއި ޚިލާފު ޢަމަލެއް ކަންވެސް ޝައިޚް ވަނީ ފާހަގަ ކުރައްވާފައެވެ. އެހެންކަމުން
އެފަދަ ވާހަކަތައް ނުދެއްކެވުމަށް ވަރަށް އިޚުލާޞްތެރިކަމާއެކު ނަޞޭޙަތްތެރި ވާކަމަށް ޝައިޚް ވިދާޅުވެފައިވެއެވެ. 

ރާއްޖެޓީވީގެ ޕޮރޮގްރާމެއްގައި ވާހަކަ ދައްކަމުން ރޮޒައިނާ ބުނީ ސުޕްރީމް ކޯޓްގެ ފަނޑިޔާރުން ސަސްޕެންޑް ކުރި މައްސަލާގައި ފަތުވާ ކޮމެޓީން ވާހަކަ ނުދައްކާ ކަމަށެވެ. އަދި ފަތުވާ ކޮމެޓީން ރައްޔިތުންނަށް މުހިންމު ކަންކަމުގައި ވާހަކަ ނުދައްކާ ކަމަަށާއި، މުޅީން ވެސް ފެންނަނީ ބޭކާރު ކަންކަމުގައި ފަތުވާ ނެރޭ ތަން ކަމަށެވެ.

ހޫރައްލީނުންގެ ވާހަކަތަކާ، މިކަހަލަ ކޮންމެވެސް ބޭކާރު ވާހަކަތަކެއްގެ ތެރޭގައި އަބަދު ތިބެގެން އެންމެ ރައްޔިތުންނަށް ހޯދައިދޭން ޖެހޭ ހައްގުތައް ހޯދައިނުދެވި ދިޔައީމަކާ އަޅުގަނޑަކަށް ހިއެއް ނުވޭ އެބޭފުޅުންގެ ވެސް ޒިންމާ އަދާކުރެވޭ ހެނެއް

ރޮޒޭނާ ބުންޏެވެ.

ރޮޒައިނާ ވަނީ ޙޫރަލްޢީންގެ ވާހަކަ އަކީ ބޭކާރު ވާހަކަތަކެއް ގޮތުގައި ސިފަ ކޮށް، ކީރިތި ޤުރްއާނުގައި ބަޔާންކުރައްވާފައިވާ ޙޫރަލްޢީންގެ ވާހަކައަށް ޖޯކު ޖަހާ ކުފުރުގެ ބަސް ބުނެފައެވެ.