ޚަބަރު
ރާއްޖޭގެ ފަތުރުވެރިކަމުގެ ދާއިރާ ކުރިއެރުވުމަށް ބީއެމްއެލް އަދި އެމްއައިބީއާއެކު މަޝްވަރާކޮށްފި

ރާއްޖޭގެ ފަތުރުވެރިކަމުގެ ދާއިރާ ކުރިއެރުވުމަށް ބީއެމްއެލް އަދި އެމްއައިބީއާއެކު ކުރިއަށް ގެންދިޔަ މަޝްވަރާ ބައްދަލުވުމުގެ ތެރެއިން/ފޮޓޯ: ފަތުރުވެރިކަމާ ބެހޭ ވުޒާރާ
ރާއްޖޭގެ ފަތުރުވެރިކަމުގެ ދާއިރާ ކުރިއެރުވުމަށް ބޭންކް އޮފް މޯލްޑިވްސް، ބީއެމްއެލް އާއި މޯލްޑިވްސް އިސްލާމިކް ބޭންކް، އެމްއައިބީއެކު މުހިންމު މަޝްވަރާތަކެއް ކޮށްފިއެވެ.
ފަތުރުވެރިކަމާ ތިމާވެއްޓާ ބެހޭ ވަޒީރު ތޯރިޤް އިބްރާހީމް އިއްޔެ ވަނީ ވަކިވަކިން ދެ ބޭންކުގެ އިސްވެރިންނާ ބައްދަލުކުރައްވާފައެވެ. މި ބައްދަލުވުމާއި ގުޅިގެން ފަތުރުވެރިކަމާ ބެހޭ ވުޒާރާއިން ވިދާޅުވީ، މި ބައްދަލުވުންތަކުގައި ފަތުރުވެރިކަމުގެ ދާއިރާއަށް އިތުރު އިންވެސްޓްމަންޓްތައް ގެނައުމާއި، ތިމާވެށި ރައްކާތެރިކުރުމުގެ މަޝްރޫޢުތަކަށް ފައިނޭންސް ކުރުމުގެ މުހިންމުކަމާ ބެހޭގޮތުން މަޝްވަރާކުރައްވާފައިވާ ކަމަށެވެ.
މި ބައްދަލުވުމުގައި ވަޒީރު ތާރިޤް އިބްރާހިިމް ވިދާޅުވީ، ފަތުރުވެރިކަމުގެ ދާއިރާ ތަރައްޤީކުރުމަށް ސަރުކާރުން ކުރަމުންދާ އެކިކަހަލަ މަސައްކަތްތަކުގައި އަމިއްލަ ފަރާތްތަކުގެ ބައިވެރިވުން ވަރަށް މުހިންމުކަމަށެވެ. ހަމައެހެންމެ، ފަތުރުވެރިކަމުގެ ދާއިރާގައި އެމްއައިބީ އަދި ބީއެމްއެލްގެ ދައުރު އިތުރުކުރުމަށް ސަރުކާރުން ބޭނުންވާކަމަށް ވެސް ވަޒީރު ވަނީ ވިދާޅުވެފައެވެ.
މި މަޝްވަރާ ބައްދަލުވުުމުގައި ބޭންކް އޮފް މޯލްޑިވްސް، ބީއެމްއެލްގެ ސީއީއޯ މުޙައްމަދު ޝަރީފް ވިދާޅުވީ، މި ދާއިރާ ތަރައްޤީކުރުމަށްޓަކައި ކުރެވެން ހުރި ހުރިހާ މަސައްކަތްތަކެއް ކުރާނެ ކަމަށެވެ. އަދި މިކަމަށް ޚާއްޞަ ލޯނު ސްކީމްތަކެއް ވެސް ތަޢާރަފުކުރުމުގެ ވިސްނުން ގެންގުޅުއްވާ ކަމަށް އޭނާ ވިދާޅުވިއެވެ. މީގެ އިތުރުން މޯލްޑީވްސް އިސްލާމިކް ބޭންކް، އެމްއައިބީގެ ސީއީއޯ މުފައްދަލް އިދްރީސް ޚުމްރީ ވިދާޅުވީ، ފަތުރުވެރިކަމުގެ ދާއިރާގައި އިންވެސްޓުކުރުމަކީ އެބޭފުޅާ ނުހަނު ޝައުގުވެރިވެލައްވާ ކަމެއް ކަމަށެވެ. ހަމަ އެހެންމެ، ރާއްޖޭގެ ތިމާވެށި ހިމާޔަތްކޮށް ރައްކާތެރިކުރުމަށްޓަކައި ކުރެވޭ އެކި މަސައްކަތްތަކަށް ފައިނޭންސް ކުރުމަށް އެމްއައިބީއިން ތައްޔާރުކަމަށް އޭނާ ވިދާޅުވިއެވެ.
މި ބައްދަލުވުމުގައި، ކުރިއަށް އޮތް ތަނުގައި ވެސް ރާއްޖޭގެ ފަތުރުވެރިކަމާއި ތިމާވެށީގެ ދާއިރާއަށް އަމާޒުކޮށްގެން މުހިންމު މަޝްވަރާތަކެއް ކުރިއަށް ގެންދިތުމަށް ވަނީ ނިންމަވާފައެވެ. އަދި ި ދާއިރާގައި ދެފަރާތުން ގުޅިގެން މަސައްކަތްކުރެއްވުމަށް ވަނީ ނިންމަވާފައެވެ.