ރިޝްވަތުގައި ނުހިފުމަށާއި ގޮޅިތަކަށް ވެއްދުން މަނާ ތަކެތި ވެއްދުމަށް ފުރުސަތު ނުދިނުމަށް އިލްތިމާސް ކުރައްވައިފި

ރިޝްވަތުގައި ނުހިފުމަށާއި ގޮޅިތަކަށް ވެއްދުން މަނާ ތަކެތި ވެއްދުމަށް ފުރުސަތު ނުދިނުމަށް ކޮމިޝަނަރ އޮފް ޕްރިޒަންސް ޙަސަން ޒަރީރު އިލްތިމާސް ކުރައްވައިފިއެވެ. 

ސީޕީ މިހެން ވިދާޅުވީ ކަރެކްޝަންސްގެ 30ވަނަ އަސާސީ ތަމްރީނު ކޯހުގެ ދަސްވެނިވުމުގެ ރަސްމިއްޔާތުގައި ވާހަކަ ދައްކަވަމުންނެވެ. ސީޕީ ވިދާޅުވީ ޤައުމެއް ޤައުމެއްގެ ގޮތުގައި ދެމިއޮތުމަށްޓަކައި ސެކިއުރިޓީ ބެލެހެއްޓުމަކީ އެންމެ މުހިންމު އެއް ކަންތައް ކަމުގައެވެ.

ސީޕީ ވިދާޅުވީ ރާއްޖެއަކީ ވަސީލަތްތައް މަދު، އެހެންނަމަވެސް ސެކިއުރިޓީ ވަރަށް މުހިންމު ޤައުމެއް ކަމަށެެވެ. އަދި މި ޤައުމުގެ ސީ ބޯޑަރު ވަރަށް ބޮޑަށް ހުޅުވިފައިވާ ކަމަށާއި، އެ ސީ ބޯޑަރުން ފެށިގެން މި ޖަލުތަކާ ހަމައަށް އެކި ބާވަތުގެ ކުށްތައް ކޮށްފައި ތިބި މީހުން އަންނަ ކަމަށް ސީޕީ ވިދާޅުވިއެވެ.  އެހެންކަމުން ދަސްވެނިންގެ އަޒުމަކަށް ހަދަންވީ އުނގެނުނު އެއްޗެއްގެ ބޭނުން ހިފުމަށް ކަމަށާއި އީމާންތެރިކަމާއި، ތެދުވެރިކަމާއި، ޤައުމީ ލޯތްބާއި، ވަފާތެރިކަމާއެކީ މަސައްކަތް ކުރުމަށް ކަމަށްވެސް ސީޕީ ޒަރީރު ވިދާޅުވިއެވެ.

ސީޕީ އިތުރަށް ވިދާޅުވީ ޖަލުތަކުގެ ސެކިއުރިޓީ ބެލެހެއްޓުމަކީ ކުޑަކަމެއް ނޫންކަމަށެވެ. އަދި ގައިދީންގެ ގޮތުގައި މިހާރުވެސް ޖަލުތަކުގައި 996 މީހުން ތިބިކަން ފާހަގަ ކުރެއްވިއެވެ. ދަރިވަރުންނާ މުޚާތަބުކުރައްވާ ސީޕީ ވަނީ ރިޝްވަތާއި ޖަލުގެ ގޮޅިތަކަށް ވެއްދުން މަނާ ތަކެތި ވެއްދުމުގެ އެއްވެސް ފުރުސަތެއް ދީގެން ނުވާނެކަމަށް ވެސް ވިދާޅުވެފައެވެ.

އަދި ދަރިވަރުންގެ ކޮނޑުގައި އެޅިފަ އޮތް ޒިންމާތަކާއި ވާޖިބުތައް ސީޕީ ވަނީ ތަކުރާރުކުރައްވާފައެވެ. ނަތީޖާ ނެރެވޭނީ ތެދުވެރިކަމާއި، އިޚްލާސްތެރިކަމާ އެކީގައި މަސައްކަތްކޮށްގެންކަމަށް ސީޕީ ވިދާޅުވިއެވެ.  އެއާއެކު ރާއްޖޭގެ ޖަލުތަކުގެ ސަލާމަތީ ކަންތައްތައް ބަލަހައްޓަން ޖެހުމުގަ މާދަމާއިން ފެށިގެން ދަރިވަރުން އުފަލަން ޖެހެނީ ޤައުމީ ވާޖިބެއްކަން ސީޕީ ހަނދާންކޮށްދެއްވިއެވެ.

ޖަލުތަކުގަ މަސައްކަތް ކުރާ 700އަށް ވުރެ އޮފިސަރުންނަކީ 24 ގަޑިއިރުގަ މަސައްކަތުގެ މައިދާނުގައި ތިއްބެވި ޤައުމީ ބަތަލުން ކަމަށާއި އެއިން އެއްވެސް އޮފސަރަކީ ދިމާވާ އެއްވެސް ކަމެއްގައި ފަހަތަށް ޖެހޭނެ ބައެއް ނޫން ކަމަށްވެސް ސީޕީ ވިދާޅުވިއެވެ.

މޯލްޑިވްސް ކަރެކްޝަނަލް ސަރވިސް (އެސްސީއެސް) އިން 'ކަސްޓޯޑިއަލް މެނޭޖްމަންޓް އެންޑް ސެކިއުރިޓީ' ޕްރޮގްރާމްގެ 12ވަނަ ބެޗް މާފުށީ ޖަލުގައި ފެށީ މިދިޔަ އަހަރުގެ ނޮވެމްބަރު މަހުގެ 16ވަނަ ދުވަހުއެވެ. މިބެޗުގައި 33 ދަރިވަރުން ދަސްވެނިވިއެވެ. މިއީ ކޮންމެ ޕްރިޒަން އޮފިސަރެއްވެސް ފުރިހަމަ ކުރުން ލާޒިމް ކޯހެކެވެ. މި ޕްރޮގްރާމަކީ އިންސްޓިޓިއުޓް ފޯރ ކަރެކްޝަނަލް ސްޓަޑީޒް (އައިކޯސްޓް) އިން މޯލްޑިވްސް ކަރެކްޝަނަލް ސަރވިސްގެ ޚިދުމަތާ ގުޅޭ ޕްރިޒަން އޮފިސަރުންނަށް ޖަލުތަކުގައި މަސައްކަތްކުރެވޭ ފެންވަރަށް ޢިލްމު އުގަންނައިދީ، ވަޒީފާގެ މާޙައުލަށް އަހުލުވެރިކޮށް، ތަމްރީނު ކުރުމަށް ހިންގާ ކޯހެކެވެ. އަދި މި އޮފިސަރުންނަކީ އަޚްލާޤު ރަނގަޅު، ސިފަވަންތަ ބަޔަކަށް ހެދުމާއި ޖަލުގެ ކަންކަން ހަރުދަނާކޮށް ތަޢުލީމީ ޒުވާނުންތަކަކަށް ހެދުމަކީވެސް މި ތަމްރީން ޕްރޮގްރާމްގެ އެއް އަމާޒެވެ.

8 މޮޑިއުލްގެ މައްޗަށް ފަރުމާކޮށްފައިވާ މި ޓްރެއިނިންގ ޕްރޮގްރާމްގައި ފިޒިކަލް ޓްރެއިނިންގ އާއި ލީޑަރޝިޕް ކްލާސްތަކާއި އެތިކްސް އާއި ޤާނޫނާއި ޤަވާއިދު ތަކުގެ އިތުރުން ޕްރިޒަންސް އޮފިސަރުންގެ މަސައްކަތްތަކާއި ގުޅުންހުރި މޮޑިއުލްތައް ކިޔަވައިދީފައިވެއެވެ. މި ޓްރެއިނިންގ ޕްރޮގްރާމްގައި ކިޔަވައިދެއްވީ އިންސްޓިޓިއުޓް ފޮރ ކަރެކްޝަނަލް ސްޓަޑީޒް (އައިކޯސްޓް)ގެ މުދައްރިބުންނާއި އެމްސީއެސްގެ ފަންނީ މުވައްޒަފުންނެވެ.