ހެންވޭރު އަދި ހުޅުމާލެ ފެރީ ޓާމިނަލް ބޭނުން ކުރުމަށް ތިން އަތޮޅަކުން ޝައުގުވެރިކަން ފާޅުކޮށްފި

ހެންވޭރު އަދި ހުޅުމާލެ ފެރީ ޓާމިނަލް ބޭނުންކުރަން ތިން އަތޮޅަކުން ފެރީގެ ޚިދުމަތްދޭ ހަތް ފަރާތުން ޝައުގުވެރިކަން ފާޅުކޮށްފައިވާ ކަމަށް އެމްޓީސީސީން ވިދާޅުވެއްޖެއެވެ.

އެމްޓިސީސީން ނެރުނު ނޫސް ބަޔާނެއްގައި ވަނީ  ހެންވޭރު އަދި ހުޅުމާލެ ފެރީ ޓާމިނަލް ބޭނުން ކުރުމަށް ޝައުގުވެރިކަން ފާޅުކުރަން ހުޅުވާލި ފުރުސަތުގައި އދ. އަތޮޅުގެ ތިން ރަށުން، ކ. އަތޮޅުންނާއި ބ. އަތޮޅުން ވެސް ފަސް ރަށަށް ޚިދުމަތްދޭ ފަރާތްތަކުން ހުށަހަޅާފައިވާ ކަމަށެވެ.

ޓާމިނަލް ބޭނުންކުރަން ޝައުގުވެރިކަން ފާޅުކޮށްފައިވަނީ:
       - އދ: ފެންފުށި، މާމިގިލި، ދިއްދޫ

       - ކ: މާފުށި، ގުރައިދޫ، ގުޅި، ގާފަރު، ކާށިދޫ

      - ބ: ތުޅާދޫ، ހިތާދޫ، ގޮއިދޫ، ފެހެންދޫ، ފުޅަދޫ

އެމްޓީސީސީން ވިދާޅުވީ ޚިދުމަތް ދޭން ފެށުމުން ދުވާލަކު 15 ލޯންޗް ފެރީއަށް އެ ޓާމިނަލުން ހިދުމަތް ދެވޭނެ ކަމަށެވެ. އެއީ ގާތްގަނޑަކަށް 2000 ފަސިންޖަރުންނެވެ. ހިދުމަތް ރޭވިފައިވާ ގޮތަށް ބަލާއިރު ހެންވޭރު ޓާމިނަލުން އެއްފަހަރާ ފަސް ލޯންޗަށް ކައިރި ކުރެވޭނެ ޖާގަ، އަދި ހުޅުމާލޭ ފެރީ ޓާމިނަލުން އެއްފަހަރާ ތިން ލޯންޗަށް ކައިރި ކުރެވޭނެ ޖާގަ ހާއްސަކޮށްފައިވާ ކަމަށް ވެސް އެމްޓީސީސީން ވިދާޅުވެފައިވެއެވެ. 

އެއާއެކު ކޮންމެ އުޅަނދަކަށްވެސް އެ އުޅަނދު ޖެޓީއަށް ލަފާ ހިސާބުން ފެށިގެން ފުރުމާއި ދެމެދު 30 މިނިޓުގެ ވަގުތެއް ލިބޭނެ ކަމަށާއި ދަތުރުވެރީން ޓާމިނަލަށް އައިސް ފުރުމާއި ދޭތެރޭ މަޑުކޮށްލުމަށް ހާއްސަ ސަރަހައްދެއް ޓާމިނަލް ތެރޭ އިންތިޒާމުކުރެވޭނެ ކަމަށްވެސް އެ ކުންފުނިން ފާހަގަ ކޮށްފައިވެއެވެ. 

ހެންވޭރު އަދި ހުޅުމާލެ ފެރީ ޓާމިނަލް ލޯންޗު ފެރީ އޮޕަރޭޓް ކުރާ އެންމެންނަށް ހުޅުވާލާލަން ނިންމި ނިންމެވުމަކީ ރައީސް ޑރ. މުހައްމަދު މުއިއްޒު ނިންމެވި ނިންމެވުމެކެވެ. މިކަމަކީ ދަތުރު ފަތުރުކުރާ އާންމު ރައްޔިތުންނައް ތަކްލީފު ކުޑަ ކުރުމުގެ ގޮތުން ނިންމެވި ނިންމެވުމެކެވެ.