މެޝިން ރީޑަބަލް ނަންބަރު ޕްލޭޓް ތަޢާރަފްކުރަނީ

ޓްރާންސްޕޯޓް މިނިސްޓްރީން އެއްގަމު އުޅަނދުތަކަށް މެޝިން ރީޑަބަލް ނަންބަރު ޕްލޭޓް ތައާރަފްކުރުމަށް ނިންމައިފިއެވެ.

އުޅަނދު ރަޖިސްޓްރޭޝަން ފަދަ ކަންކަމަށް ހޭދަވާ ވަގުތު ކުޑަކުރުމަށާއި، އުޅަނދުތަކަށް ގެއްލުންދީ ވައްކަންކުރުން މަދުކުރުމަށް ފަށާ މި ޚިދުމަތުގައި ތަންފީޒީ އިދާރާތަކަށް ޤާނޫނާއި ޤަވާޢިދު ތަންފީޒުކުރުމަށް ފަސޭހަވެގެން ދާނެއެވެ. 

ޓްރާންސްޕޯޓް މިނިސްޓްރީން ވިދާޅުވީ، މިހާރު ރާއްޖޭގެ ހުރިހާ ސަރަޙައްދެއްގައި، ޚާއްޞަކޮށް މާލެ ސަރަޙައްދުގައި، ރަޖިސްޓްރީނުކޮށް ނަންބަރު ޕްލޭޓް އަޅުވައިގެން ގިނަ އަދަދެއްގެ އުޅަނދު ދުއްވަމުންދާކަމަށެވެ. އަދި މިހާރު ބޭނުންކުރަމުންދާ ނަންބަރު ޕްލޭޓް ސިސްޓަމްގެ ސަބަބުން ތަންފީޒީ އިދާރާތަކަށް ޤާނޫނާއި ޤަވާޢިދު ތަންފީޒުކުރުމަށް ގިނަ ދަތިތަކާ ކުރިމަތިލާންޖެހޭކަމަށްވެސް އެމިނިސްޓްރީން ވިދާޅުވިއެވެ. 

މެޝިން ރީޑަބަލް ނަންބަރު ޕްލޭޓް ތަޢާރަފްކުރުމުން، އެހެން ޤައުމުތަކެކޭ އެއްފަދައިން، ރާއްޖޭގައި ވެސް ޒަމާނީ ފެންވަރުގައި އުޅަނދުތައް މޮނިޓަރކޮށް، ޤާނޫނާއި ޤަވާއިދުތައް ތަންފީޒުކުރުން ފަސޭހަވެގެންދާނެއެވެ. އަދި މި ނިޒާމުގެ ސަބަބުން ރަޖިސްޓްރީކޮށްފައިވާ އުޅަނދުތައް ޓްރެކްކުރެވި، އުޅަނދުގެ ވެރިފަރާތަށް އިތުރު ރައްކާތެރިކަން ލިބިގެންދާނެއެވެ.