ޚަބަރު
ދިރާގު "ގުޑި ފެސްޓް" މާދަމާ ހުޅުމާލޭގައި ބޭއްވުމަށް ހަމަޖެހިއްޖެ

މާލޭގެ އުސްފަސްގަނޑުގައި ބޭއްވި ގުޑިފެސްޓުގެ ތެރެއިން/ފޮޓޯ: ދިރާގު
ކޮންމެ އަހަރެއްގެ ވެސް ރަމަޟާން މަހެއްގައި ދިރާގުން ބާއްވަމުން އަންނަ "ގުޑި ފެސްޓް" މާދަމާ ހަވީރު ހުޅުމާލޭގައި ބޭއްވުމަށް ހަމަޖެހިއްޖެއެވެ.
މި ޙަރަކާތް ބޭއްވުމަށް ހަމަޖެހިފައިވަނީ މާދަމާ ހަވީރު 17:00 އިން ފެށިގެން 18:00 އަށް ދިރާގު ބީޗު، ހުޅުމާލެ ދެވަނަ ފިޔަވައްސަށް ވަންނަ ސަރަޙައްދުގައެވެ.
މި ޙަރަކާތުގައި އެކި އުމުރުފުރާތަކުގެ ކުދިންނަށް ބައިވެރިވެވޭނެ ކަމަށް ދިރާގުން މަޢޫލޫމާތުދެއެވެ. އަދި މި އިވެންޓުގައި ބައިވެރިވުމަށް އެ ސަރަޙައްދަށް ދާ ކޮންމެ ކުއްޖަކަށް ވެސް ހިލޭ ގުޑިއެއް ލިބިގެންދާނެއެވެ. މިއަހަރުގެ ގުޑިފެސްޓުގެ ފުރަތަމަ އިވެންޓު މިދިޔަ ހޮނިހިރު ދުވަހު މާލޭ އުސްފަސްގަނޑުގައި ވަނީ ބާއްވައިފައެވެ. އަދި މި ގުޑި ފެސްޓަށް ޢާންމުންގެ ފަރާތުން ބޮޑު ތަރުޙީބެއް ލިބިފައިވާއިރު، ނިމިދިޔަ އަހަރުގައިވެސް ދިރާގުން ބޭއްވި ގުޑިފެސްޓުތަކަށް ވަނީ ޢާންމުންގެ ފަރާތުން ބޮޑު ތަރުހީބެއް ލިބިފައެވެ.
ދިރާގުން ބާއްވާ މި ގުޑިފެސްޓަކީ ކޮންމެ އަހަރެއްގެ ވެސް ރަމަޟާން މަހު ދިވެހީންގެ މެދުގައި އޮންނަ ޒަމާންވީ އާދައެއްކަމަށްވާ ގުޑި އެރުވުމުގެ ހަރަކާތާއި ގުޅިގެން ކުރިއަށްދާ ފެސްޓެކެވެ. އަދި މި ޙަރަކާތް ބޭއްވުމުގެ އެންމެ ބޮޑު އެއް މަޤްސަދަކީ، ގުޑި އެރުވުމަށް ކުދިން އަހުލުވެރިކުރުން ކަމަށް ދިރާގުން މަޢުލޫމާތުދެއެވެ. އެހެންކަމުން، މިދިޔަ އަހަރެކޭ ވެސް އެއްގޮތަށް މިއަހަރުވެސް ދިރާގު ގުޑިފެސްޓް ރާއްޖޭގެ އެކި ކަންކޮޅުތަކުގައި ބޭއްވުމަށް ހަމަޖެހިފައިވާ ކަމަށް ދިރާގުން ބުނެއެވެ.