ފުރަތަމަ ބޭނުންކުރި ޑޯނިއާ 2 މަތިންދާ ބޯޓާއެކު "ކުޑަގިރި ދޫނިއާ ރެކް" ހުޅުވައިފި

ރާއްޖޭގެ އޭވިއޭޝަން ސިނާޢަތުގައި ފުރަތަމަ ބޭނުންކުރި ޑޯނިއާ 2 މަތިންދާ ބޯޓު ކުޑަގިރި ފަޅުތެރެއަށް ފައްތާ އައު ޑައިވް ސައިޓެއްގެ ގޮތުގައި ތަރައްޤީކޮށް ހުޅުވާލައިފިއެވެ.

"ކުޑަގިރި ދޫނިއާ ރެކް" ނަމުން ނަން ދެވިފައިވާ މި ސައިޓަކީ ފަތުރުވެރިކަމުގެ ދާއިރާ އިތުރަށް ތަރައްޤީކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން،  އެމްއެމްޕީއާރްސީ، އެޗްޑީސީ އަދި އެމްޓީސީސީ ގުޅިގެން ތަރައްޤީ ކޮށްފައިވާ ސައިޓެކެވެ. މި ސައިޓަށް މިހާރު ވަނީ އެއަރ މޯލްޑިވްސްގެ ދުވަސްވަރު ބޭނުންކުރި ޑޯނިއާ 228 މަރުކާގެ ދެ މަތިންދާ ބޯޓު ފައްތާފައެވެ.

އެޗްޑީސީން ވިދާޅުވީ، މިނަން ދީފައިވަނީ ތާރީޚީގޮތުން ރާއްޖެއަށް ޚާއްސަ ދެ އުޅަނދެއް ފައްތައިގެން ތަރައްޤީކޮށްފައިވާ ސައިޓަކަށްވުމާއެކު، އެދެ އެއަރކްރާފްޓަކީ ރާއްޖޭގެ އެވިއޭޝަން ސިނާޢަތުގެ ފެށުންކަމުގައިވާތީ އުދުހުން ދޭހަކޮށްދިނުމަށްޓަކައި ދޫންޏަށް ނިސްބަތްކޮށްފައިކަމަށެވެ. 

ކުޑަގިރި އަކީ ކުރީގެ ސަރުކާރުން މާލޭ ސަރަޙައްދުގައިި ދިރިއުޅޭ މީހުން ދަތުރު ދިއުމަށް ޚާއްޞަކޮށް ހުޅުވާލާފައިވާ ރަށެކެވެ. މި ރަށް ބަލަހައްޓަމުން ދަނީ ހައުސިން ޑިވޮލޮޕްމަންޓް ކޯޕަރޭޝަން އެޗްޑީސީންނެވެ.