ކަމަދޫ އާއި މާއެނބޫދޫގެ ފުޓްބޯޅަ ދަނޑު ނިންމުމާއި ކުރެންދޫ ދަނޑުގެ ލައިޓް ހަރުކުރުމަށް ފެނަކައަށް

ބ. ކަމަދޫ އާއި ދ. މާއެނބޫދޫގެ ފުޓްބޯޅަ ދަނޑު ޤާއިމްކުރުމާއި، ޅ. ކުރެންދޫ ދަނޑުގެ ލައިޓް ހަރުކުރުމުގެ އިތުރުން ހަތަރު ރަށަކަށް ބޭނުންވާ ޑްރޭގް ބްރަޝް މެޝިން ހޯދުމަށް ފެނަކައާ ހަވާލުކޮށްފިއެވެ.

ކުޅިވަރާއި ހަށިހެޔޮކަމާ ބެހޭ ވުޒާރާއިން ވިދާޅުވީ ރާއްޖޭގެ އެކި ސަރަހައްދުތަކުގައި ހުއްޓިފައި ހުރި ކުޅިވަރު ޕްރޮޖެކްޓްތައް ފުރިހަމަކުރުމުގެ ޕްރޮގްރާމް ސަރުކާރުން މިދިޔަ އަހަރު ފެށިއިރު، އެ މަސައްކަތުގެ ބޮޑުބައެއް މިހާރު ނިންމާފައިވާ ކަމަށެވެ. މި މަސައްކަތްތައް ވީހާވެސް އަވަހަށް ހަރުދަނާ ގޮތެއްގައި ނިންމެވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެއް ކަމަށާއި، ސަރުކާރު ހިއްސާވާ ކުންފުނިތަކަށް މި ޕްރޮޖެކްޓްތައް ހަވާލުކޮށް މި އަހަރުގެ ދެވަނަ ކުއާޓާގެ ތެރޭގައި ނިންމުމުގެ މަސައްކަތް ކުރަމުންދާ ކަމަށްވެސް ވިދާޅުވިއެވެ. 

އެގޮތުން ޅ. ކުރެންދޫ ފުޓްބޯޅަ ދަނޑުގެ ލައިޓިން ސިސްޓަމް 90 ދުވަހުގެ ތެރޭގައި ނިންމަން ފެނަކަ ކޯޕަރޭޝަނާއި ވަނީ ހަވާލުކޮށްފައެވެ. މި މަސައްކަތަށް 1.6 މިލިއަން ރުފިޔާ ހޭދަވާނެއެވެ.

މީގެ އިތުރުން ބ. ކަމަދޫ ފުޓްބޯޅަ ދަނޑުގެ ޓާފް ސަޕްލައިކޮށް އިންސްޓޯލްކުރުމަށް 4.7 މިލިއަން ރުފިޔާ ހޭދަވާނެ ކަމަށާއި، މި މަސައްކަތް ނިންމަން 60 ދުވަހުގެ މުއްދަތެއް ދީފައިވާކަމަށް ވިދާޅުވިއެވެ.

އެއާއެކު ދ. މާއެނބޫދޫ ފުޓްބޯޅަ ދަނޑުގެ މަސައްކަތް ނިންމަން 120 ދުވަސް ދީފައި ވެއެވެ. 6 މިލިއަން ރުފިޔާ ހަރަދުވާ މި މަޝްރޫޢުގެ ތެރޭގައި ހިމެނެނީ ދަނޑުގެ ޓާފް އިންޓޯލްކުރުމާއި، ފަށާފާރު ރޭނުމާއި ފެންސް ޖެހުމުގެ މަސައްކަތެވެ.

މި މަސައްކަތްތަކުގެ އިތުރުން ބ. ކެންދޫ، ބ. ދަރަވަންދޫ، ބ. ތުޅާދޫ އަދި ރ. މީދޫގެ ފުޓްބޯޅަ ދަނޑަށް ބޭނުންވާ ޑްރޭގް ބްރަޝް މެޝިނާއި ބެންޗުތައް ހޯދުމަށްވެސް ފެނަކަ ކޯޕަރޭޝަންއާ ވަނީ ހަވާލުކޮށްފައެވެ.