ރައީސްގެ ވަޢުދުފުޅާ އެއްގޮތަށް ކުނި މެނޭޖްކުރާ ސެންޓަރުތައް ތަރައްޤީކުރުމުގެ ބޮޑު ޕްރޮޖެކްޓެއް

 2025 ވަނަ އަހަރު ނިމުމުގެ ކުރިން ރާއްޖޭގެ ހުރިހާ ރަށެއްގައިވެސް އެ ރަށަކާއި އެކަށޭނަ ކުނި މެނޭޖްކުރާނޭ ނިޒާމެއް ޤާއިމުކޮށްދެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. 

މި ވަޢުުދުފުޅުގެ ދަށުން 75 ރަށެއްގައި ކުންޏާއި ވަޞީލަތްތައް މެނޭޖްކުރާ މަރުކަޒު ޤާއިމުކުރުމާއި އަޕްގްރޭޑް ކުރުމުގެ މަސައްކަތް ތިން ކުންފުންޏަކާއި ހަވާލުކޮށްފިއެވެ. އެގޮތުން ކުންޏާއި ވަޞީލަތްތައް މެނޭޖްކުރާ މަރުކަޒު ޤާއިމުކުރުމާއި އަޕްގްރޭޑް ކުރުމުގެ މަސައްކަތް ހަވާލު ކޮށްފައިވަނީ ސަރުކާރު ހިއްސާވާ ތިން ކުންފުނި ކަމުގައިވާ، އެމް.ޓީ.ސީ.ސީ، އާރު.ޑީ.ސީ އަދި ފެނަކަ ކޯޕަރޭޝަނާއެވެ. 

މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓުން ވިދާޅުވީ ރައީސްގެ މި ވަޢުދުފުޅުގެ އަމާޒަށް ވާސިލް ވުމަށްޓަކައި،  ކުރިއަށްގެންދާ "މަގޭ ސާފުރާއްޖެ ޕްރޮގްރާމް" ގެ ތެރެއިން، ޖުމްލަ 75 ރަށެއްގައި ކުންޏާއި ވަޞީލަތްތައް މެނޭޖްކުރާ މަރުކަޒުތައް ގާއިމުކުރުމާއި އަޕްގްރޭޑް ކުރުމުގެ މަސައްކަތް ހަވާލުކުރެވިފައިވާ ކަމަށެވެ. އަދި މިދިޔަ ހަފުތާގެ ތެރޭގައި އެ މިނިސްޓްރީންވަނީ 34 ރަށެއްގައި ކުންޏާއި ވަސީލަތްތައް މެނޭޖްކުރާ މަރުކަޒުތައް ޤާއިމުކުރުމުގެ މަސައްކަތް ވޭސްޓް މެނޭޖްމަންޓް ކޯޕަރޭޝަނާއި ޙަވާލުކޮށްފައި ކަމަށެވެ.

 75 ރަށެއްގެ ކުނި މެނޭޖްކުރާ ސެންޓަރުތައް ތަރައްޤީކުރުމުގެ މަސައްކަތް ސަރުކާރު ހިއްސާވާ 3 ކުންފުންޏަކާއި ޙަވާލުކުރުމުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓު ޠާރިޤު އިބްރާހިމް ވިދާޅުވީ މިއީ ތިމާވެށީގެ އިތުރުން ލޯކަލް ޓޫރިޒަމަށްވެސް މުހިއްމު މަސައްކަތެއް ކަމުގައެވެ. އެއާއެކު ރަށްރަށުގައި ލޯކަލް ޓޫރިޒަމް ތަރައްޤީވެގެންދާއިރު ރަށްރަށުގެ ސާފުތާހިރުކަން ވަރަށް މުހިއްމު ދައުރެއް އަދާކުރާނެ ކަމެެއް ކަމަށްވެސް މިނިސްޓަރ ވިދާޅުވިއެވެ.

މި ރަސްމިއްޔާތުގައި ވަޒީރު ޠާރިޤް އިބްރާހީމްގެ އިތުރުން އެމްޓީސީސީގެ ސީއީއޯ އަދި އެމްޑީ، ޑެޕިއުޓި ކޮމިޝަނަރ އޮފް ޕޮލިސް ރިޓަޔާޑް އަޙްމަދު ސަޢުދީ، ފެނަކަ މެނޭޖިންގ ޑިރެކްޓަރ މޭޖަރ ރިޓަޔަރޑް މުޙައްމަދު ނަޖާޙު އަދި އާރްޑީސީ މެނޭޖިންގ ޑިރެކްޓަރ، ބްރިގޭޑިއަރ ޖެނެރަލް ރިޓަޔާރޑް ޢަލީ ޒުހައިރު ބައިވެރިވެ ވަޑައިގެންނެވިއެވެ.