ޑިމާންޑާއި އެއްވަރަށް ކަރަންޓު ފޯރުކޮށްދިނުމަށް ސްޓެލްކޯއިން ޤާއިމުކުރި ބެކަޕް އިންޖީނުގެ ހުޅުވައިފި

މާލެ ސަރަހައްދުގައި އިތުރުވާ ކަރަންޓްގެ ޑިމާންޑަށް ޚިދުމަތްދިނުމަށް ސްޓެލްކޯއިން ހުޅުމާލޭގައި ޤާއިމްކުރި  ބެކަޕް އިންޖީނުގެ (ހުޅުމާލޭ އެނެކްސް 2) ހުޅުވައިފިއެވެ.

މިއަހަރުގެ ޕީކް ސީޒަނާއި ދިމާކޮށް ކަރަންޓު ބޭނުންކުރާ މިންވަރު އިތުރުވާނެކަމަށް ބެލެވޭތީ ހުޅުމާލޭގައި ޤާއިމުކުރި ބެކަޕް އިންޖީނުގެއެއް ކަމަށް ސްޓެލްކޯއިން ވިދާޅުވިއެވެ. 48000 އަކަފޫޓުގެ ބިމެއްގައި ހުޅުވިގެންދިޔަ އައު އިންޖީނުގެ އަކީ ސްޓެލްކޯގެ މުވައްޒަފުން އެންމެ 10 ދުވަހުގެ ތެރޭގައި ކޮށްފައިވާ ބުރަ މަސައްކަތެއް ކަމަށް އެ ކުންފުނިން ވިދާޅުވިއެވެ. 

އިންޖީންގެ ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން ސްޓެލްކޯގެ މެނޭޖިންގ ޑިރެކްޓަރ ޙުސެއިން ފަހުމީ ވިދާޅުވީ، ފަހު 10 ސަރުކާރު ބަންދުކުރުމާއި އަދި ސްކޫލް ޗުއްޓީއާއި ދިމާވާތީ އެހެން އަހަރުތަކާއަޅާބަލާއިރު މިއަހަރުގެ ރަމަޟާން މަހު، ކަރަންޓު ކެޕޭސިޓީ މައްޗަށްދާ މިންވަރު އިތުރުވާނެކަމަށް ލަފާނުކުރެވޭކަމަށެވެ. އެހެންނަމަވެސް ރަމަޟާން މަހަށްފަހު އަންނަނީ ހޫނު މޫސުމުގެ ކަރަންޓު ޕީކްވާނެ ދުވަސްވަރުކަމަށް ބެލެވޭތީ ސްޓެލްކޯއިން ތައްޔާރުވަމުންދާކަމަށް ވިދާޅުވިއެވެ.

ސްޓެލްކޯއިން ހުޅުމާލޭގައި ޤާއިމުކުރި އައު އީންޖީނުގޭގައި 1.6 މެގަވޮޓްގެ  12 ޖަނަރޭޓަރު ސެޓު ބެހައްޓާނެ ކަމަށް ސްޓެލްކޯއިން މީގެ ކުރިން ވިދާޅުވެފައި ވެއެވެ.  މީގެތެރެއިން 7 ޖަނަރޭޓަރު ސެޓު މިހާރު ކޮމިޝަންކޮށް ބޭނުންކުރަން ފަށާފައިވާއިރު ބާކީ 5 ޖަނަރޭޓަރު ސެޓު މި މަހުގެ ތެރޭގައި ގެނައުމަށް ހަމަޖެހިފައިވާކަމަށް ސްޓެލްކޯއިން ވިދާޅުވެއެވެ.