ރާއްޖޭގައި ގައިންގަޔަށް ނާރާ ބަލިތައް ގިނަވުމުގެ ސަބަބަކީ ދުންފަތުގެ އިސްތިޢުމާލު ކުރުން ގިނަވުން: މެޑިކަލް އެސޯސިއޭޝަން

ރާއްޖޭގައި ގައިންގަޔަށް ނާރާ ބަލިތައް ގިނަވުމުގެ އެންމެ ބޮޑު ސަބަބަކީ ދުންފަތުގެ އިސްތިޢުމާލުކުރުން ގިނަވުން ކަމަށް ދިވެހިރާއްޖޭގެ މެޑިކަލް އެސޯސިއޭޝަނުން ބުނެފިއެވެ. 

އެމްއެމްއޭ އިން ނެރެފައިވާ ނޫސްބަޔާނެއްގައި ބުނެފައިވަނީ ދުނިޔެއާއި ރާއްޖޭގައި ވެސް ޞިއްޙީ މަސްރަހުގައި މިއަދު ކުރިމަތިލާންޖެހޭ އެންމެ ބޮޑު އެއް ގޮންޖެހުމަކީ ގައިންގަޔަށް ނާރާ ބަލިތައް ކަމަށެވެ. 

ދުންފަތާއި ދުންފަތުގެ ބާވަތްތައް ބޭނުންކުރުމަކީ މިފަދަ ބަލިތަކަށް މަގުފަހިވާ ކަންކަމުގެ ތެރެއިން އިސްރޯލެއް އަދާކުރާކަމެއް ކަމުގައި އެތައް ދިރާސާއަކުން ދައްކާކަމަށެވެ. 

އެފަދަ ބަލިތަކުގެ ތެރޭގައި ނޭވާލާ ނިޒާމުގެ ބަލިތައް، ހިތުގެ ބަލިތައް، ހަކުރު ބަލި އަދި ސްޓްރޯކް ހިމެނޭކަމަށްވެސް އެމްއެމްއޭގެ ބަޔާނުގައި ބުނެފައިވެއެވެ. އަދި ދިރާސާތަކުން ދައްކާގޮތުން ރާއްޖޭގައި ދުންފަތުގެ އިސްތިޢުމާލު ކުރާ މީހުން އެކަން ފަށަނީ އުމުުރުން 18 އަހަރު ނުފުރެނީސް ކަަމަށްވެސް ބުނެފައިވެއެވެ. 

ދުންފަތަކީ އެތައް ހާސް ކެމިކަލް މާއްދާ އާއި 250 ވިހަ އެކުލެވޭ އެއްޗެއް ކަމަށާއި އޭގެ ތެރެއިން 70 މާއްދާއިން ކެންސަރަށް މަގުފަހިވާކަން ދިރާސާތަކުން ދައްކާކަމަށް އެއޮސސޭސިއޭޝަނުން ބުނެފައިވެއެވެ. އަދި ރާއްޖޭގައި ދުންފަތުގެ އިސްތިޢުމާލު ކުރުން މަނާކުރުމަކީ އެންމެ ރަނގަޅު ގޮތް ކަންވެސް މެޑިކަލް އެސޯސިއޭޝަނުން ވަނީ ފާހަގަކޮށްފައެވެ.

ޕުއްޕާމެއަށް ޖެހޭ ކެންސަރު ބަލީގެ 85 އިންސައްތަ ސަބަބަކީ ދުންފަތުގެ ސީދާ ދުން ކަމަށްވާއިރު، އަހަރަކު 8 މިލިއަން މީހުން ދުންފަތުގެ އިސްތިއުމާލު ކުރުމުގެ ސަބަބުން އެކި ބަލިތަކުގައި މަރުވާ ކަމަށާއި، މީގެ ތެރެއިން 1.3 މިލިއަން މީހުންނަކީ ދުންފަތުގެ ނުސީދާ ދުމުން ދުނިޔެ ދޫކުރަންޖެހޭ މީހުން ކަން ވެސް އެ އެސޯސިއޭޝަންގެ  ބަޔާނުގައި ފާހަގަކޮށްފައިވެއެވެ. 

ވޭޕް ބޭނުންކުރުން 34 ޤައުމެއްގައި މަނާކޮށްފައިވާއިރު، އެ އެމްއެމްއޭއިން ވަނީ ދުންފަތުގެ ބާވަތްތަކާއި ވޭޕް ރާއްޖޭގައި ވެސް މަނާކުރުމަށް އެކަށޭނެ ފިޔަވަޅުތަކެއް އެޅުމަށް ކަމާބެހޭ އިދާރާތަކަށް އިލްތިމާސްކޮށްފައެވެ.