ޑެޕިއުޓީ މޭޔަރަކަށް މުޙައްމަދު ޢަރީޝް ޢައްޔަނުކޮށްފި

މާލެ ސިޓީ ކައުންސިލުގެ ޑެޕިއުޓީ މޭޔަރަކަށް މާފަންނު ހުޅަނގު އުތުރު ދާއިރާގެ މެންބަރު މުޙައްމަދު ޢަރީޝް ޢައްޔަނުކޮށްފިއެވެ.

އަރީޝް މި މަޤާމަށް އައްޔަނު ކުރައްވާފައިވަނީ މިއަދު މާލޭ  ސިޓީ ކައުންސިލުގެ 4 ވަނަ ދައުރުގެ 188 ވަނަ ރަސްމީ ޖަލްސާގައެވެ. ޑެޕިއުޓީ މޭޔަރު ހޮވުމަށް މާލެ ސިޓީ ކައުންސިލުން ބޭއްވި އިންތިޚާބުގައި މެމްބަރު މުޙައްމަދު ޢަރީޝް، ޑެޕިއުޓީ މޭޔަރު ކަމަށް އިންތިޚާބު ކޮށްފައިވަނީ ވޯޓުގައި ބައިވެރިވި 16 މެމްބަރުންގެ ފުރިހަމަ އަޣްލަބިއްޔަތުންނެވެ. މި މަޤާމަށް ޢަރީޝްގެ އިތުރުން އެހެން އެއްވެސް ފަރާތަކުން ޝައުޤުވެރިކަން ފާޅުކޮށްފައެއް ނުވެއެވެ. އެހެން ކަމުން ޑެޕިއުޓީ މޭޔަރު އައްޔަން ކޮށްފައިވަނީ ފެންނަ ނުފެންނަ ވޯޓަކުންނެވެ.

މާލެ ސިޓީ ކައުންސިލްގެ ޑެޕިއުޓީ މޭޔަރު އަދި މާފަންނު މެދުދާއިރާގެ މެންބަރު އަހުމަދު ނަރީޝް ވަނީ އެ މަޤާމުން ނިމިދިޔަ ހަފްތާގެ ތެރޭގައި އިސްތިއުފާ ދެއްވާފައެވެ. ސަބަބެއް ކަމަށް  ވިދާޅުވެފައިވަނީ ޤައުމާއި ރައްޔިތުންނަށް އެހެން ހައިސިއްޔަތަކުން ޚިދުމަތް ކުރުމުގެ ފުރުޞަތު ލިބުމާ ގުޅިގެން ކަމަށެވެ.