ޚަބަރު
ކުޑަކުދިންގެ ކަރާމާތާއި އަބުރުވެރިކަން ނުގެއްލޭ ގޮތަށް ކޮންޓެންޓު ފޮނުވުމަށް އިލްތިމާސްކޮށްފި

ފޮޓޯ: ބްރޯޑްކާސްޓިނގް ކޮމިޝަން
ކުޑަކުދިންގެ ކަރާމާތާއި އަބުރުވެރިކަން ނުގެއްލޭގޮތަށް ކޮންޓެންޓު ފޮނުވުމަށް މޯލްޑިވްސް ބްރޯޑްކާސްޓިންގ ކޮމިޝަނުން އިލްތިމާސްކޮށްފިއެވެ.
ބްރޯޑްކޮމްއިން ނެރެފައިވާ ސަރކިއުލަރއެއްގައިވަނީ، އެ ކޮމިޝަނުން ލައިސަންސް ދޫކޮށްފައިވާ ހުރިހާ ބްރޯޑްކާސްޓަރުން ފޮނުވާ ކޮންޓެންޓަކީ ދިވެހިރާއްޖޭގެ ޤާނޫނުތަކާއި ޤަވާއިދު އަދި ޢާންމު އިޖުތިމާޢީ މިންގަނޑާއި ނޫސްވެރިކަމުގެ އަޚްލާޤީ މިންގަނޑަށް ފެތޭ ގޮތަށް ހުންނަ ކޮންޓެންޓް ކަމުގައި ހެދުމަށް ބްރޯޑްކާސްޓަރުންނަށް އިލްތިމާސްކުރާ ކަމަށެވެ.
އެގޮތުން ބްރޯޑްކާސްޓްކުރުމުގެ ޤާނޫނުގެ 37 ވަނަ މާއްދާގެ ދަށުން ބްރޯޑްކާސްޓަރުން އަމަލުކުރުމަށް އެކުލަވާލާފައިވާ "ބްރޯޑްކާސްޓް ކުރުމުގެ ކޯޑް އޮފް ޕްރެކްޓިސް"ގައި ކަނޑައަޅާފައިވާ ހަމަތަކާއި ގައިޑްލައިންތަކާއި އެއްގޮތަށް އަމަލުކުރުމަށް ބްރޯޑްކޮމްއިން އަންގާފައިވެއެވެ.
ބްރޯޑްކާސްޓިން ކޮމިޝަނުން ބުނެފައިވަނީ ވަކީން ހާއްސަކޮށް "ބްރޯޑްކާސްޓް ކުރުމުގައި ކުޑަކުދިން ހިމާޔަތްކުުުރުމުގައި ޢަމަލުކުރަންވީ ގައިޑްލައިން" ގެ ހަމަތަކާއި އެއްގޮތަށް ކުޑަކުދިންގެ ކަރާމާތާއި އަބުރުވެރިކަން ނުގެއްލޭގޮތަށް ކޮންޓެންޓް ފޮނުވުމަށް ބްރޯޑްކާސްޓަރުން ސަމާލުވުމަށް ހަނދާންކޮށްދޭ ކަމަށެވެ.
ބްރޯޑްކޮމްއިން މި ސަރކިއުލަރ ނެރެފައި މިވަނީ، ރާއްޖޭގައި ރަޖިސްޓްރީކޮށްފައިވާ ސިޔާސީ ޕާޓީއަކުން އިންތިޒާމްކުރި އެއްވުމެއްގެ ތެރެއިން ކުޑަކުއްޖެއްގެ ކަރާމާތައް އުނިކަމެއް އަންނަފަދަ ގޮތަކަށް ވާހަކަދެއްކުމާއި އަދި ދިވެހިރާއްޖޭގައި ރަޖިސްޓްރީކޮށްގެން ހިންގާ މީޑިއާއަކުން އެ މަންޒަރާއި އަޑު ދައްކާފައިވާތީ ކުއްޖާއާއިމެދު ހިންގާފައިވާ މިއަމަލު ކުށްވެރިކޮށްފައެވެ.