ފަރުތައް އިޔާދަ ކުރުމަށް މުރަކަ ވިއްސާ މަޝްރޫއެއް އިފްތިތާހުކޮށްފި

އެކުއަކަލްޗަރ ސިސްޓަމެއް މެދުވެރިކޮށް މުރަކަ ވިއްސާ ފުޅާ ދާއިރާއެއްގައި ފަރުތައް އިޔާދަ ކުރުމުގެ މަޝްރޫއެއް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް އިފްތިތާޙް ކޮށްދެއްވައިފިއެވެ.

މިއީ މޯލްޑިވްސް މެރިން ރިސާރޗް އިންސްޓިޓިއުޓާއި (އެމް.އެމް.އާރް.އައި) އޮސްޓްރޭލިއަން އިންސްޓިޓިއުޓް ފޮރ މެރިން ސައިންސް (އެއިމްސް) އަދި ކޮމަންވެލްތް ސައިންޓިފިކް އެންޑް އިންޑަސްޓްރިއަލް ރިސާރޗް އޯގަނައިޒޭޝަން (ސީއެސްއައިރޯ) އާއި ގުޅިގެން "ރީފްސީޑް" ގެ ނަމުގައި ފަށާފައިވާ ޕްރޮޖެކްޓެކެވެ. 

މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ވިދާޅުވީީ މި ޕްރޮޖެކްޓަކީ، ކޮރަލް ރިސާރޗް އެންޑް ޑިވެލޮޕްމަންޓް އެކްސެލެރޭޓަރ ޕްރޮގްރާމް (ކޯޑެޕް)ގެ އެހީގައި ހިންގޭ 3 އަހަރު ދުވަހުގެ ޕްރޮޖެކްޓެއް ކަމަށެވެ. މިޕްރޮޖެކްޓްގެ އަމަލީ މަސައްކަތްތައް ރާއްޖޭގައި ފެށުން ފާހަގަ ކުރުމަށްޓަކައި "ރީފް ސީޑް ޑެމޮންސްޓްރޭޝަން ޑޭ" ގެ ނަމުގައި ޚާއްސަ ހަރަކާތެއް ކ. މަނިޔަފުށީގައި ބާއްވާފައިވެއެވެ. 

ރީފްސީޑް ޕްރޮޖެކްޓްގެ އަމަލީ މަސައްކަތްތައް ރާއްޖޭގައި ފެށުމުގެ ކުރިން އެމް.އެމް.އާރް.އައިގެ މުވައްޒަފުން ވަނީ 2024 ވަނަ އަހަރު، އޮސްޓްރޭލިއާގެ އެއިމްސްގެ ފެސިލީޓީގައި މުރަކަ ވިއްސާ އާލާކުރުމާއި ފަރުތައް އިޔާދަކުރުމުގެ ފަންނުތަށް އުނގެނި ރީފްސީޑް ސިސްޓަމް ބޭނުންކުރުމަށް ތަމްރީނުދެވިފައެވެ. "ރީސް ސީޑް ޑެމޮންސްޓްރޭޝަން ޑޭ" ގޮތުގައި ކ. މަނިޔަފުށީގައި ބޭއްވުމަށް ހަމަޖެހިފައިވާ ހަރަކާތުގައި، ފަރުތައް ހިމާޔަތްކޮށް އިޔާދަކުރުމުގެ މަސްލަހަތުވެރި ސަރުކާރުގެ އިދާރާތަކާއި ޖަމްއިއްޔާތަކުގެ ބޭފުޅުން ރީފްސީޑް ސިސްޓަމަށް އަހުލުވެރިކުރުވައި އަދި ކުރިއަށް ރޭވިފައިހުރި މަސައްކަތްތަކުގެ މަޢުލޫމާތު ދިނުން ހިމެނެއެވެ