އެއްބިމަކަށް އެއް ފަރާތަށް ވުރެ ގިނަ ފަރާތްތަކުން ޢިމާރާތްކުރުމުގެ ހުއްދައަށް އެދި ހުށަހަޅަމުންދާ މައްސަލަ ފުލުހަށް

އެއްބިމަކަށް އެއް ފަރާތަށް ވުރެ ގިނަ ފަރާތްތަކުން ޢިމާރާތްކުރުމުގެ ހުއްދައަށް އެދި ހުށަހަޅަމުންދާ މައްސަލަ ހައުސިންގ ޑިވޮލޮޕްމަންޓް ކޯޕަރޭޝަން އެޗްޑީސީން  ފުލުހަށް ހުށަހަޅައިފިއެވެ.

އެޗްޑީސީން ނެރެފައިވާ ނޫސް ބަޔާނެއްގައިވަނީ ދިވެހި ސަރުކާރުން ހިންގެވި 'ބިންވެރިޔާ' ސްކީމުގެ ދަށުން ހުޅުމާލެ އިން ދޫކޮށްފައިވާބިންތަކުގެ އިމާރާތްކުރުމުގެ ހުއްދައަށް އެދޭ އިރު އެއްބިމަކަށް އެއް ފަރާތަށް ވުރެ ގިނަ ފަރާތްތަކުން ޢިމާރާތްކުރުމުގެ ހުއްދައަށް އެދި އެ ކޯޕަރޭޝަނަށް ހުށަހަޅަމުންދާތީ، އެކަން އެ ކޯޕަރޭޝަނުގެ ސަމާލުކަމަށް އައިސްފައިވާ ކަމަށެވެ. އެހެންކަމުން އެމައްސަލަ އިތުރަށް ބަލައި، އެކަމާއި ގުޅިގެން އަޅަންޖެހޭ ފިޔަވަޅުތައް އެ ކޯޕަރޭޝަނުގެ ފަރާތުން އަޅަމުން ގެންދާ ކަމަށްވެސް ވިދާާޅުވެފައި ވެއެވެ.

އެޗްޑީސީން އިތުރަށް ވިދާޅުވީ 'ބިންވެރިޔާ' ސްކީމްގެ ދަށުން ހުޅުމާލެއިން ދޫކޮށްފައިވާ ބިންތަކާއި ގުޅޭގޮތުން ޚާއްޞަ އޮޑިޓެއްކޮށް، އެ އޮޑިޓުން، 'ބިންވެރިޔާ' ސްކީމާ ގުޅޭ މިފަދަ އިތުރު މައްސަލަތަކެއް ފާހަގަވެފައިވާތީ، އެ މައްސަލަތައް އިތުރަށް ތަޙްޤީޤު ކުރުމަށްޓަކައި، ދިވެހި ފުލުހުންގެ ޚިދުމަތަށް އެޗްޑީސީގެ ފަރާތުން ހުށަހަޅާފައިވާކަމަށެވެ،

އަދި ކުރިއަށްއޮތް ތަނުގައިވެސް، މިފަދަ ކަންކަން ބަލައި އަޅަންޖެހޭ އެންމެހައި ފިޔަވަޅުތައް އަޅަމުން ގެންދާނެ ކަމަށްވެސް އެޗްޑީސީން ވިދާޅުވެފައި ވެއެވެ. އެޗްޑީސީން ވިދާޅުވީ އެ ކޯޕަރޭޝަނުން އަބަދުވެސް މަސައްކަތް ކުރަނީ، ރައްޔިތުންގެ ލާބައާއި މަންފާއަށް އަދި ރައްޔިތުންނަށް ދޭންޖެހޭ ޚިދުމަތްތައް ނަޒާޙަތްތެރިކަމާއެކު އެންމެ ފުރިހަމައަށް ފޯރުކޮށް ދިނުމަށް ކަަމަށެވެ. 

ބިންވެރިޔާ ސްކީމަކީ މިދިޔަ ސަރުކާރުން އެއްވެސް ބެލުމެއްނެތި މަގުމައްޗަށް އަރާ ގޮތަށް  ދޫކޮށްފައި ހުރި ގޯތި ތަކެއް ކަމަށާއި 150 އެއްހައި ގޯތި އެގޮތަށް އެބަހުރި ކަމަށް ރައީސް ޑރ.މުޙައްމަދު މުޢިއްޒު މީގެ ކުރިން ވަނީ ވިދާޅުވެފައެވެ. ބިންވެރިޔާ ސްކީމްގެ ދަށުން ދޫކޮށްފައިވާ ގޯތިތަކުގެ ތެރެއިން މަގުތަކަށް އަރާ ގޮތަށް ދޫކޮށްފައިވާ ގޯތިތަކުގެ މައްސަަލަ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވަނީ ހައްލު ކޮށްފައެވެ. އަދި މި ސަރުކާރުން ދަނީ ގެޒެޓުގައިވާ ލިސްޓުގައިވާ އެންމެންނަށްވެސް ގޯތި ދިނުމުގެ މަސައްކަތް ކުރަމުންނެވެ.