ކާނިވާ ސަރަޙައްދުގައި އަލަށް ހަދާ ސްޓޭޖްގެ އަގަކީ ހަތަރު މިލިއަން

މާލެ ސީޓީގެ ކާނިވާ ސަރަޙައްދުގައި މިހާރު ހުރި ސްޓޭޖު ތަޅާލުމަށް ފަހު، އެ ތަނުގައި އައު ސްޓޭޖެއް ތަރައްޤީކުރުމަށް ބަޔާކާ ހަވާލު ކޮށްފިއެވެ.

މާލޭ ސިޓީ ކައުންސިލުން ވިދާޅުވީ މާލޭ ސިޓީ ކައުންސިލްގެ ބެލުމުގެ ދަށުގައިވާ، ކާނިވާ ސަރަހައްދުގައި މިހާރު ޢިމާރާތް ކޮށްފައިވާ ސްޓޭޖް ތަޅައިލުމަށް ފަހު، އައު ސްޓޭޖެއް ތަރައްޤީކުރުމަށް ކައުންސިލުން ހަވާލުކޮށްފައިވަނީ ޔޫ.އެޗް އިންވެސްޓްމަންޓް ޕްރައިވެޓް ލިމިޓެޑާ ކަމަށެވެ. މިި މަސައްކަތް އެ  ކުންފުންޏާއި ހަވާލު ކޮށްފައިވަނީ މިމަހުގެ 14 ވަނަ ދުވަހުގައި ކަމަށްވެސް ސިޓީ ކައުންސިލުން ވިދާޅުވިއެވެ.

ސިޓީ ކައުންސިލް ވިދާޅުވީ ކައުންސިލުން މި މަސައްކަތް ނިންމަން ހަވާލުކޮށްފައިވާ މުއްދަތަކީ، 2025 ވަނަ އަހަރު މާރޗް މަހުގެ 14 ވަނަ ދުވަހުން ފެށިގެން 2025 ވަނަ އަހަރު ޖުލައި މަހުގެ 31 ވަނަ ދުވަހުގެ ނިޔަލަށް ކަމަށެވެ. އެއާއެކު ޖީއެސްޓީ ހިމެނޭހެން މަސައްކަތުގެ އަގަކީ  4,847,000.00 (ހަތަރު މިލިއަން އަށް ލައްކަ ސާޅީސް ހަތް ހާސް) ދިވެހި ރުފިޔާ ކަމާށް ވެސް ސިޓީ ކައުންސިލުން ވިދާޅުވެފައި ވެއެވެ. 

މާލެ ސިޓީގެ މޭޔަރ އާދަމް ޢާޒިމް ސޯޝަލް މީޑީއާގައި ކުރެއްވި ޕޯސްޓުގައި ވިދާޅުވެފައި ވަނީ، ޒަމާންތަކެއް ވަންދެން ހަލާކުވެ ވީރާނާވާން ދޫކޮށްލާފައިވާ މި ސްޓޭޖް، ދެން ފެނިގެންދާނީ، އެންމެ ޒަމާނީ ފެންވަރުގެ ތަނެއްގެ ގޮތުގައި ކަމަށެވެ. 

 ކާނިވަލުގެ އައު ސްޓޭޖްގެ މަސައްކަތަކީ މާލެ ސިޓީގެ މޭޔަރު ކަމާ، މިހާރުގެ މޭޔަރ އާދަމް ޢާޒިމް ހަވާލުވެ ވަޑައިގަތުމަށް ފަހު، މިހާރު އޮތް ކައުންސިލްގެ ފްލޯއިން ފާސްކުރެވިގެން ކުރުމަށް ނިންމާފައިވާ މަސައްކަތެއްކަމަށް ކައުންސިލުން ހާމަކޮށްފައިވެއެވެ.