"ހިޔާވެހި ފައިނޭންސިންގ ޕްރޮގްރާމް" އަށް އެދުމުގެ ވަގުތު އިތުރުކޮށްފި

"ހިޔާވެހި ފައިނޭންސިންގ ޕްރޮގްރާމް" ގެ ދަށުން ގެދޮރު އިމާރާތްކުރުމަށް ދޫކުރާ އިސްލާމިކް ފެސިލިޓީއަށް އެދި ހުށަހެޅުމުގެ  މުއްދަތު އިތުރުކޮށްފިއެވެ.

މިނިސްޓްރީ އޮފް ކޮންސްޓްރަކްޝަން ހައުސިން އެންޑް އިންފްރާ ސްޓްރަކްޗަރއިން ވިދާޅުވީ ފައިނޭންސިންގ ފެސިލިޓީތަކަށް އެދުމަށްޓަކައި "ހިޔާވެހި ޕޯޓަލް" މެދުވެރިކޮށް ފޯމް ހުށަހެޅުމުގެ މުއްދަތު 2025 އޭޕްރީލް 30 ވާ ބުދަ ދުވަހުގެ ރޭ 23:59 ގެ ނިޔަލަށް އިތުރުކޮށްފައިވާ ކަމަށެވެ.

"ހިޔާވެހި ފައިނޭންސިންގ ޕްރޮގްރާމް" އަކީ ބޯހިޔާވަހިކަމަށް ލުއި ގޮތެއްގައި ލޯނު ލިބޭނޭ ގޮތެއް ހޯއްދަވައިދިނުމުގެ ވަޢުދުފުޅުގެ ދަށުން 5% އިންޓަރެސްޓުގައި ގެދޮރު އިމާރާތް ކުރުމަށް ސަރުކާރުން ހުޅުވާލި ލުއި ލޯނު ލިބޭ ސްކީމެކެވެ.

މި ސްކީމްގެ ދަށުން އެޗްޑީއެފްސީ މެދުވެރިކޮށް ހަމަ އެކަނި އަތޮޅު ތެރޭގެ ރަށްރަށުގައި ގެހެދުމަށް 1 މިލިޔަން ރުފިޔާއާއި ހަމައަށް ލޯން ލިބޭނެއެވެ. އެއާއެކު އާބަން ސެންޓަރުތަކުގައި ގެދޮރު އަޅަން ޚާއްޞަ ސްކީމެއް ކަނޑައަޅާފައިވެއެވެ. މި ސްކީމްގެ ދަށުން 3 މިލިޔަން ރުފިޔާއާއި ހަމައަށް ލޯނު ދޫކުރާނެއެވެ. މީގެ އިތުރުން މާލޭ ސަރަހައްދުގައި ގެދޮރު ހަދަން ޚާއްޞަކޮށް ދޫކުރާ ލޯނެއްވެސް މި ސްކީމްގެ ދަށުން ލިބޭގޮތް ވަނީ ހަމަޖައްސާފައެވެ. ފުރަ މާލެއަށް ޚާއްޞަ ކޮށްފައިވާ ސްކީމްގައި 6 މިލިޔަން ރުފިޔާއާއި ހަމައަށް ލޯން ދޫކުރާ ގޮތަށް ވަނީ ހަމަޖެހިފައެވެ. އާބަން ސެންޓަރުތައް އަދި ފުރަމާލެއަށް ޚާއްޞަކޮށް ކުރިއަށްގެންދާ ލޯނު ސްކީމްތައް ކުރިއަށްގެންދާނީ ބީއެމްއެލް އަދި އެމްއައިބީ މެދުވެރިކޮށެވެ.

މި ލޯން ސްކީމްގެ ދަށުން އަލަށް ގެދޮރު ހެދުމުގެ އިތުރަށް ނުނިމި ހުރި ގޭގެ ނިންމަން ވެސް އަދި ބާވެ އަލުން ހަދަން ޖެހޭ ގޭގެ ހަދަން ވެސް ލޯނު ދޫކުރަން ވަނީ ނިންމާފަ އެވެ. މި ޕްރޮގްރާމުގެ ދަށުން ލޯނު އެޕްލިކޭޝަންތަކަށް މާދަމާއިން ފެށިގެން  ހިޔާވެހި ޕޯޓަލް މެދުވެރިކޮށް ހުށަހެޅޭނެއެވެ.