ސައިކަލު މަޑިދަށުން ވައްކަންކުރުން އިތުރުވާތީ އާންމުން ހޭލުތެރި ކުރުމުގެ ޕްރޮގްރާމެއް

ސައިކަލު މަޑިދަށުން ވައްކަންކުރުމާއި ސައިކަލު ވަގަށް ނެގުމުގެ މައްސަލަތަކުން ރައްކާތެރިކުރުވުމަށް މައުލޫމާތުދިނުމުގެ ހަރަކާތެއް ދިވެހި ފުލުހުންގެ ޚިދުމަތުން މާލޭގައި ކުރިއަށް ގެންގޮސްފިއެވެ.

މި ހަރަކާތް ކުރިއަށް ގެންގޮސްފައިވަނީ އިއްޔެގެ ވަގުތެއްގައި ވިލިމާލެ ފެރީ ޓާމިނަލް ސަރަހައްދުގައެވެ. މިއީ މާފަންނު ނެއިބަހުޑް ޕޮލިހާއި ޕަބްލިކް ޓްރަސްޓް އެންޑް ކޮންފިޑެންސް މެނޭޖްމަންޓު ގުޅިގެން ކުރިއަށް ގެންދިޔަ ހަރަކާތެއް ކަމަށް ދިވެހި ފުލުހުންގެ ޚިދުމަތުން މަޢުލޫމާތު ދެއެވެ.  

ފުލުހުން ވިދާޅުވީ ފެރީ ޓާމިނަލް ސަރަހައްދުގައި ސައިކަލު ޕާކުކުރާ ގާތްގަނޑަކަށް ފަންސާހަކަށް މީހުންނާ މި ހަރަކާތުގެ ތެރެއިން ބައްދަލުކޮށް ހޭލުންތެރިކުރުވުމަށް މައުލޫމާތުދީފައިވާ ކަމަށެވެ. އެގޮތުން، ސައިކަލު ޕާކުކޮށްފައިދާއިރު ތަޅުދަނޑި ނެގުނުތޯ ޔަގީންކުރުމަށާއި ޝަޓަރ ލޮކްކުރުމަށާއި ހުންގާނު ވެސް ލޮކްކުރެވުނުކަން ޔަގީންކުރުމަށް ފަހުގައި ނޫނީ ނުދިއުމަށް ހަނދާންކޮށްދީފައިވާ ކަމަށްވެސް ވިދާޅުވިއެވެ.

އޭގެ އިތުރުން، މުހިންމު ލިޔެކިޔުމާއި އަގުބޮޑެތި ތަކެތި ޕޮކެޓް އަދި މަޑިދަށުގައި ނުބެހެއްޓުމަށާއި ސައިކަލުގެ ތަޅު ހަލާކުވެފައިވާނަމަ ތަޅު ބަދަލުކުރުމަށް އިލްތިމާސްކޮށްފައިވެއެވެ. އަދި ރައްކާތެރިކަމުގެ މައުލޫމާތު ހިމެނޭ ލީފްލެޓް ދީފައިވެއެވެ.