ތިން ފަސިންޖަރެއްގެ އަތުން ވޭޕްއާ ގުޅުންހުރި ދެހާހަށް ވުރެ ގިނަ ތަކެތި އަތުލައިގެންފި

ރާއްޖެއަށް އައި ތިން ފަސިންޖަރެއްގެ އަތުން ވޭޕްއާ ގުޅުންހުރި ދެހާހަށް ވުރެ ގިނަ ތަކެތި އަތުލައިގެންފިއެވެ.

މޯލްޑިވްސް ކަސްޓަމްސް ސާރވިސަސްއިން ހާމަކޮށްފައިވާ ގޮތުގައި، މި ތަކެތި އަތުލައިގެންފައި ވަނީ ވެލާނާ އިންޓަނޭޝަނަލް އެއާރޕޯޓަށް އިއްޔެ މެލޭޝިއާއިން އައި ފަސިންޖަރުންތަކެއްގެ އަތުންނެވެ. އަދި އެމީހުންގެ އަތުން، ވޭޕް އާއި ވޭޕްކުރަން ބޭނުންކުރާ ސާމާނު ހިމެނޭގޮތަށް 2062 އައިޓަމް ހިފެހެއްޓުނުކަމަށް ވެސް ކަސްޓަމްސްއިން ވަނީ ބުނެފައެވެ.

އަދި މި ތަކެތި ހޯދުނީ، ފޮރުވައިގެން ރާއްޖެ އެތެރެކުރަން އުޅޭކަމަށް ޝައްކު ކުރެވިގެން އެމީހުންގެ ތަކެތި އިތުރަށް ބެލުމުންނެވެ.

މި ތަކެތި އަތުލައިގަނެފައިވަނީ މެލޭޝިޔާއިން އިއްޔެ ރާއްޖެ އައި 3 ފަސިންޖަރެެއްގެ ލަގެޖުގައި ވޭޕް އާއި ވޭޕްކުރަން ބޭނުންކުރާ ސާމާނު ފޮރުވާފައި ހުރިކަމަށް ޝައްކުކުރެވިގެން އިތުރަށް ބަލާފާސްކުރުމުގެ ތެރޭގައި.

ކަސްޓަމްސްއިން ބުނެފައިވެއެވެ.

މި މީހުން އެތެރެކުރަން އުޅުނު ތަކެތީގެ ތެރޭގައި ހިމެނެނީ 1،714 ނެނޯ ސްޓިކް އާއި 200 ޓެރިއާ ސްޓިކް އާއި 96 ކެލިބަރން ކާޓްރިޖް އާއި 50 ވީމޭޓް ކާޓްރިޖް އަދި 2 ވޭޕް ފްލެވަރ ލިކުއިޑް ފުޅިއެވެ.

މި މައްސަލަ އިތުރަށް ތަޙުޤީޤު ކުރަމުންދާކަމަށް ވެސް ކަސްޓަމްސްއިން ވަނީ ބުނެފައެވެ.

ރާއްޖެއަށް ވޭޕް އާއި ވޭޕް ކުރުމަށް ބޭނުންކުރާ ތަކެތި އެތެރެކުރުން މަނާވީ، 15 ނޮވެންބަރު 2024 ގައި، ދުންފަތް ކޮންޓްރޯލް ކުރުމާ ބެހޭ ގާނޫނަށް ގެނައި އިސްލާހަށް ޢަމަލުކުރަން ފެށުމާ ގުޅިގެންނެވެ.

އެ ގާނޫނުގައިވާ ގޮތުން ވޭޕް ކުރަން ބޭނުންކުރާ އާލާތްތަކާއި އެކަމަށް ތައްޔާރު ކޮށްފައިވާ އުފެއްދުންތައް ރާއްޖެ އެތެރެކޮށްފި ނަމަ 50،000ރ. އަދި އެތެރެކުރާ ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕް އާލާތަކަށް 10،000ރ.ގެ މަގުން ޖޫރިމަނާ ކުރާނެއެވެ.